សារព័ត៌មាន នគរវត្ត តែងតែនាំមុខគេជានិច្ច
រាល់សកម្មភាពរៀបចំសម្រាប់ពិធីដង្ហែក្បួនព្យុហយាត្រាយោធា ទ្រង់ទ្រាយធំក្នុងសប្តាហ៍នេះ ក្រោមអធិបតីភាពរបស់មេដឹកនាំ គីម ជុងអ៊ុន។ តាមសារព័ត៌មាន យ៉ុងហាប់របស់កូរ៉េខាងត្បូងបានឱ្យដឺងថា រាល់សកម្មភាពបានត្រៀមលក្ខណៈរួចរាល់ទាំងស្រុងសម្រាប់ពិធីដង្ហែក្បួន។
សារព័ត៌មានរ៉យទ័រ បានផ្សាយថា ក្រុមអ្នកអង្គេតការណ៍អន្តរជាតិបានតាមដានយ៉ាងយកចិត្តទុកដាក់ដល់សកម្មភាពដង្ហែក្បួនយោធា សព្វាវុធ ក្នុងឱកាសខួប៧៥ឆ្នាំ ថ្ងៃបង្កើតបក្សពលករកាន់អំណាចដឹកនាំកូរ៉េខាងជើងនៅថ្ងៃទី១០ខែតុលា។
អ្វីដែលសហគមន៍អន្តរជាតិទន្ទឹងរង់ចាំនោះ មិនមែនការបង្ហាញអាវុធទំនើបៗនោះឡើយ គឺជាការប្រកាសសារនយោបាយដ៏សំខាន់របស់មេដឹកនាំ គីម ជុងអ៊ុនទៅកាន់ពលរដ្ឋកូរ៉េខាងជើងនិងសហគមន៍អន្តរជាតិ។ ប្រសិនបើសាររបស់គីម ជុងអ៊ុនពិតជាមានគោលបំណងចង់បានសន្តិភាព ការអភិវឌ្ឍប្រទេសជាតិនោះគឺជារឿងដ៏ល្អបំផុតសម្រាប់ពលរដ្ឋប្រទេសនេះរួចផុតពីសង្គ្រាម។
ជាមួយគ្នានេះ ប្រធានាធិបតីកូរ៉េខាងត្បូងក៏បានស្នើដល់អាមេរិកសហការគ្នាពិភាក្សា ហើយចុះសន្ធិសញ្ញាសន្តិភាពបញ្ចប់សង្គ្រាមឧបទ្វីបកូរ៉េ។ នៅថ្ងៃទី៨ខែតុលា ប្រធានាធិបតីមូន ជេអុីន បានស្នើអាមេរិកសហការដើម្បីចេញសេចក្តីប្រកាសបញ្ចប់សង្គ្រាមឧបទ្វីប ដែលបានផ្ទុះឡើងនៅឆ្នាំ១៩៥០ ហើយបញ្ចប់នៅឆ្នាំ១៩៥៣ ដោយកិច្ចព្រមព្រៀងឈប់បាញ់តែប៉ុណ្ណោះ។ ទាំងនោះមានន័យថា រយៈពេលជិត៧០ឆ្នាំកន្លងមកពលរដ្ឋកូរ៉េខាងជើង រស់នៅក្នុងស្ថានភាពនៃសង្គ្រាម មិនទាន់មានសន្តិភាពនៅឡើយទេ៕ដោយ៖ធី រីណា
