សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ៖ បើយោងតាមរដ្ឋបាលខេត្តកំពង់ធំ បានឱ្យដឹងថា៖ ការអំពាវនាវនេះ បានលើកឡើង នាព្រឹកថ្ងៃទី១៣ ខែតុលា ឆ្នាំ២០២០ ខណៈដែលលោក សុខ លូ អភិបាលខេត្តកំពង់ធំ និងក្រុមការងារចុះត្រួតពិនិត្យស្ថានភាពទឹកតាមដងស្ទឹងសែន និងទីទួលសុវត្ថិភាពនៅក្នុងស្រុកសណ្ដាន់ ខេត្តកំពង់ធំ ដើម្បីត្រៀមរៀបចំបង្ការសម្រាប់ជួយសង្គ្រោះបងប្អូនប្រជាពលរដ្ឋដែលទទួលរងគ្រោះដោយសារទឹកជំនន់ឲ្យបានទាន់ពេលវេលា ជៀសវៀងគ្រោះថ្នាក់ណាមួយ កើតឡើងជាយថាហេតុ។
លោក សុខ លូ បន្ថែមទៀតថា ៖ មកដល់ពេលនេះ ស្ថានភាពទឹកនៅក្នុងភូមិសាស្ត្រខេត្តកំពង់ធំ មិនទាន់ដល់កម្រឹតកំពស់ប្រកាសប្រុងប្រយ័ត្ននោះទេ។ ទន្ទឹមនឹងនោះ លោកអភិបាលខេត្តកំពង់ធំ ក៏បានផ្តាំផ្ញើដល់បងប្អូនប្រជាពលរដ្ឋទាំងអស់ សូមប្រុងប្រយ័ត្នខ្ពស់ព្រោះនៅបណ្តាថ្ងៃខាងមុខនៅមានឥទ្ធិពលនៃព្យុះបន្តបោកបក់មកលើប្រទេសកម្ពុជាយើង អាចនឹងមានទឹកជន់ឡើងបន្ថែមទៀត ជាពិសេស ត្រូវមើលថែក្មេងៗឲ្យបានល្អ ដើម្បីចៀសផុតពីការលង់ទឹក ឆ្លងចរន្តអគ្គិសនី ក៏ដូចជាការការពារពីសត្វអសិរពិសនានាខាំឬទិចជាដើម។
លោកបានបញ្ជាក់ទៀតថា «ពេលណាប្រជាពលរដ្ឋជួបទុក្ខលំបាក ពេលនោះ គឺតែងតែមានមុខថ្នាក់ដឹកនាំខេត្ត ក្រុង ស្រុក ឃុំ សង្កាត់ ចុះជួយដោះស្រាយរាល់បញ្ហា និងទុក្ខកង្វល់របស់បងប្អូនប្រជាពលរដ្ឋជានិច្ច»។
បន្ថែមលើសពីនេះទៀត លោក សុខ លូ បានជំរុញឲ្យអាជ្ញាធរ ក្រុង ស្រុក ឃុំ សង្កាត់ បន្តតាមដាននូវស្ថានភាពទឹកជំនន់បន្តទៀត ដើម្បីងាយស្រួលក្នុងការត្រៀមខ្លួនចុះជួយបងប្អូនប្រជាពលរដ្ឋឲ្យបានទាន់ពេលវេលា ក្នុងនោះ យើងក៏បានត្រៀមរួចជាស្រេចនូវទីទួលសុវត្ថិភាព គ្រប់ក្រុងស្រុក សម្រាប់ជួយបងប្អូនប្រជាពលរដ្ឋនៅពេលមានទឹកជំនន់កើតឡើង ព្រមទាំងជំរុញឲ្យមន្ទីរកសិកម្ម រុក្ខាប្រមាញ់ និងនេសាទខេត្ត បន្តចុះត្រួតពិនិត្យផលប៉ះពាល់ ដំណាំស្រូវ របស់បងប្អូនប្រជាពលរដ្ឋ និងត្រៀមពូជសម្រាប់ជួយសង្គ្រោះបងប្អូនសាបព្រោះបង្កបង្កើនផលឡើងវិញបន្ទាប់ពីទឹកជំនន់ត្រូវបានស្រកចុះ៕
ដោយ៖ សិលា
