សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ៖ នៅព្រឹកថ្ងៃព្រហស្បតិ៍ ៦កើត ខែកត្តិក ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី២២ ខែតុលា ឆ្នាំ ២០២០ នេះ លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម បានចូលរួមអមដំណើរ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងពិធីចុះជួបសួរសុខទុក្ខ និងចែកអំណោយជូនបងប្អូនប្រជាពលរដ្ឋ១ម៉ឺនគ្រួសារ ដែលរងគ្រោះដោយសារជំនន់ទឹកភ្លៀង នៅទីតាំងចំនួន ០២ គឺ ទីតាំងទី១ នៅបរិវេណផ្សារហង្ស ស៊ីផា ភូមិផ្សារថ្មី ឃុំគំរូ ស្រុកថ្មពួក និងទីតាំងទី២ នៅបរិវេណខាងជើងរង្វង់មូលផ្លូវជាតិលេខ៥៨ ភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ។
សូមបញ្ជាក់ថា៖ សម្ដេចតេជោហ៊ុនសែន ក៏បានបង្ហាញអំពីទឹកចិត្តស្រឡាញ់ប្រជាពល ក្នុងនោះសម្ដេចបានមានប្រសាសន៍ថា ៖ «សម្រាប់ខ្លួនខ្ញុំ គឺខ្ញុំគ្មានទម្លាប់ ដើរចោលប្រជាជន នៅពេលដែលប្រជាជន កំពុងជួបការលំបាកទេ ខ្ញុំនៅចាំបានថា នៅពេលទឹកជំនន់ឆ្នាំ ២០០០ ខ្ញុំប្រើពេល ៦៨ថ្ងៃ ដោយគ្មានសម្រាកដើម្បីសង្គ្រោះប្រជាជន នៅពេលនោះដែលមានទំហំដ៏ធំរាប់លានគ្រួសារ ប៉ុន្តែមកដល់ពេលនេះត្រឹមតែប៉ុន្មានសិបមុឺនគ្រួសារ យើងត្រូវមានវត្តមានជួយប្រជាពលរដ្ឋយើង៕
ដោយ៖ សុខ ខេមរា
