វាយប្រហារគ្រាប់បែកអត្តឃាតនៅមជ្ឈមណ្ឌលអប់រំអាហ្វហ្គានីស្ថានស្លាប់២៤នាក់

រដ្ឋាភិបាលអាហ្វហ្គានីស្ថាន និងអង្គការណាតូបានថ្កោលទោសយ៉ាងខ្លាំងដល់សកម្មភាពវាយប្រហារភេរវកម្មខាងលើ។ ការវាយប្រហានោះគឺសំដៅទៅលើក្រុមអ្នកកាន់សាសនាអ៊ិស្លាមនិកាយស៊ីអុីត ។
ក្រសួងមហាផ្ទៃអាហ្វហ្គានីស្ថាន នៅថ្ងៃទី២៥ខែតុលាបានប្រកាសថា ការវាយប្រហារគ្រាប់បែកអត្តឃាតសំដៅទៅលើមជ្ឈមណ្ឌលអប់រំក្នុងទីក្រុងកាប៊ុល សម្លាប់មនុស្សដល់ទៅ២៤នាក់ភាគច្រើនជាសិស្ស ដែលមានអាយុចាប់ពី១៥ដល់២៦ឆ្នាំ។ ការវាយប្រហារនៅមជ្ឈមណ្ឌលអប់រំ Kawsar-e Danish ក្រៅពីសម្លាប់មនុស្ស២៤នាក់នៅមាន៥០នាក់ផ្សេងទៀតរងរបួស។
ក្រុមភេរវកម្ម IS បានចេញមុខ ទទួលខុសត្រូវពីការវាយប្រហារ ខាងលើ ប៉ុន្តែមិនបានផ្តល់ភស្តុតាងណាមួយបន្ថែមទៀតនោះឡើយ។ ចំណែកក្រុមតាលីបង់វិញ បានច្រានចោលថាខ្លួនមិនជាប់ពាក់ព័ន្ធ ការវាយប្រហារនោះទេ។ រដ្ឋាភិបាលអាហ្វហ្គានីស្ថាន និងអង្គការណាតូ បានថ្កោលទោសយ៉ាងខ្លាំងដល់សកម្មភាពវាយប្រហារខាងលើ ដែលជាការវាយប្រហារសំដៅទៅលើក្រុមអ៊ិស្លាមនិកាយស៊ីអុីត នៅភាគខាងលិចទីក្រុងកាប៊ុល។
នេះជាសកម្មភាពវាយប្រហារថ្មីបំផុតក្នុងប្រទេសនេះបង្កឡើងដោយក្រុមភេរវកម្មរដ្ឋអ៊ិស្លាម (IS)។ ការវាយប្រហារលើកមុនៗភាគច្រើនបង្កឡើងដោយក្រុមតាលីបង់ ប៉ុន្តែ ក្រុមតាលីបង់និងរដ្ឋាភិបាលបានព្រមព្រៀងគ្នាស្វែងរកសន្តិភាពបញ្ចប់សង្គ្រាម ដោយបានជួបពិភាក្សាគ្នាជាច្រើនលើកកន្លងមក៕ ធី រីណា