សារព័ត៌មាន នគរវត្ត តែងតែនាំមុខគេជានិច្ច
សហព័ន្ធបាល់ទាត់ពិភពលោក (FIFA) បានប្រកាសថា លោក Gianni Infantino បានឆ្លងជំងឺកូវីដ-១៩។ បុរសវ័យ៥០ឆ្នាំ មានរោគសញ្ញាស្រាលហើយនឹងនៅដាច់ដោយឡែកពីគេរយៈពេល១០ថ្ងៃ។
ស្ថាប័ននេះបានអះអាងថា មនុស្សទាំងអស់ដែលបានទាក់ទងជាមួយប្រធាន FIFA អំឡុងពេលប៉ុន្មានថ្ងៃចុងក្រោយនេះត្រូវបានជូនដំណឹងហើយពួកគេកំពុងត្រូវបានស្នើសុំឱ្យចាត់វិធានការចាំបាច់ ។
ការបង្ហាញខ្លួនជាសាធារណៈចុងក្រោយរបស់លោក Infantino គឺនៅក្នុងកិច្ចប្រជុំកំពូលនៃការប្រតិបត្តិរបស់ FIFA ដែលបានបញ្ចប់កាលពីថ្ងៃទី១៦ ខែតុលានៅពេលដែលអ្នកចូលរួមទាំងអស់មានវត្តមានតាមរយៈការប្រជុំតាមវីដេអូ។
ការរីករាលដាលនៃជំងឺនេះបានធ្វើឱ្យមានការសង្ស័យអំពីជំនួបដ៏មានសក្តានុពលកាលពីថ្ងៃពុធរវាងកីឡាករ Cristiano Ronaldo និង Lionel Messiក្នុងក្របខ័ណ្ឌ Champions League បន្ទាប់ពីខ្សែប្រយុទ្ធរបស់ក្រុមJuventus បានធ្វើតេស្តវិជ្ជមានជំងឺកូវីដ-១៩កាលពីដើមខែនេះ។
គួរបញ្ជាក់ថា ករណីឆ្លង និងស្លាប់ដោយសារជំងឺកូវីដ-១៩ នៅក្នុងមូលដ្ឋាននៃប្រទេសស្វីសបានកើនឡើងទ្វេដងពីមួយសប្ដាហ៍ទៅមួយសប្តាហ៍ពេញមួយខែតុលា។ រដ្ឋាភិបាលនៃប្រទេសនេះត្រូវបានគេរំពឹងថា នឹងសម្រេចចិត្តលើវិធានការថ្មីដើម្បីគ្រប់គ្រងការរីករាលដាលនៃជំងឺនេះ៕ដោយ៖ភារៈ
