សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ យុវជនម្នាក់ត្រូវបានក្រុមគ្រួសារនិងអ្នកភូមិនាំគ្នាប្រញាប់ប្រញាល់ជួយសង្គ្រោះលើកមកដាក់កប់ដីខ្សាច់និងចាក់ទឹកអោយជោកផងដែរ ប៉ុន្តែអកុសលហួសពេលទៅហើយ ខណៈដែលយុវជនរូបនេះបានតខ្សែភ្លើងម៉ូទ័របូមទឹកខ្វះការប្រុងប្រយ័ត្នបណ្ដាលឱ្យឆក់បង្កការភ្ញាក់ផ្អើលតែម្ដង។
ហេតុការណ៍នេះបានកើតឡើងកាលពីវេលាម៉ោង៤និង៣៥នាទីរសៀលថ្ងៃទី៣១ខែតុលាឆ្នាំ២០២០ ស្ថិតនៅចំណុចភូមិថ្មី ឃ៉ំថ្មី ស្រុកកំពង់រោទ៍។
បើតាមសមត្ថកិច្ចនគរបាលស្រុកបានឱ្យដឹងថា យុវជនរងគ្រោះមានឈ្មោះ កើត ហាយ អាយុ១៦ឆ្នាំ មុខរបរសិស្សមានទីលំនៅភូមិឃ៉ំកើតហេតុខាងលើ។
បើតាមអ្នកភូមិបានឱ្យដឹងថា មុនកើតហេតុគេឃើញយុវជនឈ្មោះកើត ហាយនេះបានអូសបន្លាយខ្សែភ្លើងដើម្បីតម៉ូទ័របូមទឹកដាក់ពាង ប៉ុន្តែចៃដន្យអាក្រក់ដោយខ្វះការប្រុងប្រយ័ត្នស្រាប់តែត្រូវខ្សែភ្លើងឆក់បង្កការភ្ញាក់ផ្អើលពីសំណាក់ក្រុមគ្រួសារស្រែកហៅអ្នកភូមិនាំគ្នាប្រញាប់ប្រញាល់ជួយសង្គ្រោះលើកយកមកកប់ដីខ្សាច់និងចាក់ទឹកអោយជោក ប៉ុន្តែអកុសលហួសពេលទៅហើយ។
សពក្រោយពីសមត្ថកិច្ចជំនាញពិនិត្យរួចបានប្រគល់ឱ្យក្រុមគ្រួសារធ្វើបុណ្យតាមប្រពៃណីទាំងក្ដុកក្ដួលបំផុត៕ យឹម សុថាន
