សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សមត្ថកិច្ចបានឃាត់ខ្លួនភ្នាក់ងារ២នាក់នៃឆ្នោតវៀតណាមដែលមានសញ្ញាសម្គាល់ C56 របស់ថៅកែឈ្មោះ ប៊ុនធឿន ដោយមានការឯកភាពពីលោក សុក កែវបណ្ឌិត ព្រះរាជអាជ្ញារងអមសាលាដំបូងរាជធានីភ្នំពេញ ។ ប៉ុន្តែ តាមប្រភពព័ត៌មានបង្ហើបថា មេឆ្នោតវៀតណាម ឈ្មោះ ប៊ុនធឿន កំពុងរត់ការឱ្យមានការដោះលែងវិញ ។
នគរបាលខណ្ឌដង្កោបានបង្ក្រាបទីតាំងកត់ឆ្នោតវៀតណាមដុះស្លែមួយនេះ កាលពីថ្ងៃទី៥ ខែវិច្ឆិកា ឆ្នាំ២០២០ វេលាម៉ោង១១ៈ៣០នាទី នៅចំណុចមុខផ្ទះជួលគ្មានលេខ ផ្លូវបេតុង សាលាកសិកម្មចំការដូង ក្នុងភូមិខ្វារ សង្កាត់ដង្កោ ខណ្ឌដង្កោ រាជធានីភ្នំពេញ ។
សមត្ថកិច្ចបានបង្ហើបប្រាប់នៅថ្ងៃទី៦ ខែវិច្ឆិកា ឆ្នាំ២០២០នេះថា ភ្នាក់ងារ២នាក់ នៃឆ្នោតវៀតណាមសញ្ញាសម្គាល់ C56 របស់ឈ្មោះ ប៊ុនធឿន នេះ គឺ ទី១មានឈ្មោះ ធុយ ស៊ីត្រៃ អាយុ២១ឆ្នាំ និង ទី២ឈ្មោះ សេង សុខភី អាយុ២៥ឆ្នាំ ។
នៅដំណាក់កាលសមត្ថកិច្ច ជនសង្ស័យទាំង២នាក់បានសារភាពថា ពួកគេពិតជាបានទទួលកត់ឆ្នោតវៀតណាមអោយថៅកែឈ្មោះ ប៊ុនធឿន អាយុប្រហែល៣៥ឆ្នាំ ដែលមានសញ្ញាសម្គាល់ C56 ពិតប្រាកដមែន ។
ប្រជាពលរដ្ឋលើកឡើងថា ទីតាំងកត់ឆ្នោតវៀតណាមដែលមានសញ្ញាសម្គាល់ C56 នេះ គឺដំណើរការជាយូរមកហើយ ដោយមានថៅកែឈ្មោះ ប៊ុនធឿន ជាអ្នកកាងរហូតមក ។
ប្រជាពលរដ្ឋសង្ឃឹមថា សមត្ថកិច្ចក៏ដូចជាតុលាការ នឹងចាត់វិធានការចំពោះភ្នាក់ងារទាំង២នាក់នេះ និងតាមចាប់ខ្លួនថៅកែឈ្មោះ ប៊ុនធឿន នេះផង ៕
ដោយ៖ចេស្តា
