សារព័ត៌មាន នគរវត្ត តែងតែនាំមុខគេជានិច្ច
តារាងពណ៌ខៀវគ្របដណ្តប់នៅលើទីផ្សារមូលបត្រនៅតំបន់អឺរ៉ុប និងអាស៊ី ដោយសារតែក្រុមអ្នកវិនិយោគធូរអារម្មណ៍ក្រោយមានសភាពតានតឹងជាច្រើនថ្ងៃដោយសារតែការបោះឆ្នោតអាមេរិក ហើយពេលនេះលោកបៃឌិនជាប់ឆ្នោតជារឿងប្រសើរបំផុតសម្រាប់ទីផ្សារមូលបត្រ។
នៅថ្ងៃទី ៩ខែវិច្ឆិកា ទីផ្សារមូលបត្រប្រែជាពណ៌ខៀវលើកដំបូងក្រោយទទួលបានលទ្ធផលបោះឆ្នោតអាមេរិក ដោយលោកបៃឌិនទទួលបានជ័យជម្នះ។ នៅក្នុងតារាងតួលេខទីផ្សាររបស់ក្រុមហ៊ុន Nikkei 225 ក្នុងទីក្រុងតូក្យូ ជប៉ុនបង្ហាញឲ្យឃើញជាលើកដំបូងក្នុងរយៈពេល២៩ឆ្នាំកន្លងមកដែល Nikkei 225 កើនពិន្ទុខ្ពស់។ជាក់ស្តែងពិន្ទុបានកើនឡើងបន្ថែម ៥១៤,៦១ ស្មើនិឹង២,១២% ជួយឲ្យចំនួនពិន្ទុសរុបដល់ទៅ២៤.៨៣៤,៨៤ពិន្ទុ គឺខ្ពស់បំផុតមិនធ្លាប់មានចាប់តាំងពីថ្ងៃទី៥ខែវិច្ឆិកា ឆ្នាំ១៩៩១ មកទល់ពេលនេះ។
ជាមួយគ្នានេះដែរ តួលេខទីផ្សារមូលបត្រ Topix បានកើនឡើងបន្ថែម២៣,៤១ពិន្ទុស្មើនិឹង១,៤១ភាគរយពេលបិទទីផ្សារ ពិន្ទុសរុបកើនឡើងដល់១.៦៨១,៩០ ពិន្ទុ។
ចំណែកទីផ្សារនៅកូរ៉េខាងត្បូង ដូចជា KOSPI កើនឡើង១,២៧%ផងដែរ។ ទីផ្សារមូលបត្រនៅទីក្រុងសៀងហៃ Shanghai Composite ក៏មានការកើនឡើង១,៩ភាគរយផងដែរ។ ចំណែកហុងកុងកើនឡើង១,៣%។
ដោយឡែកនៅក្នុងតំបន់អឺរ៉ុបវិញ STOXX 600 របស់អឺរ៉ុបកើនឡើង១,៣ភាគរយ ។តួលេខ DAX 30នៅទីក្រុងFrankfurt ប្រទេសអាល្លឺម៉ង់កើនឡើង១,៧% ។តួលេខ CAC 40 នៅទីក្រុងប៉ារីស ប្រទេសបារាំង កើនឡើង១,៥%។ទីផ្សារFTSE 100 ក្នុងទីក្រុងឡុងដុង កើនឡើង១,៥ភាគរយ…។
និយាយជារួមគ្រប់ទីផ្សារមូលបត្រទាំងអស់លើពិភពលោកគ្របដណ្តប់ដោយពណ៌ខៀវបន្ទាប់ពីលោកបៃឌិនជាប់ឆ្នោត ប្រធានាធិបតីអាមេរិក ។ មិនថាទីផ្សារមូលបត្រប៉ុណ្ណោះទេទីផ្សារផ្សេងទៀតក៏មានក្តីសង្ឃឹមដំណើរការសេដ្ឋកិច្ចឡើងវិញ ក្រោយបញ្ចប់កូវីដ-១៩៕ដោយ៖ធី រីណា
