សារព័ត៌មាន នគរវត្ត តែងតែនាំមុខគេជានិច្ច
កាលពីថ្ងៃទី៩ ខែវិច្ឆិកា សម្ពន្ធមិត្តជាតិ ដើម្បីប្រជាធិបតេយ្យ (NLD) កាន់អំណាចនៅមីយ៉ាន់ម៉ាដែលដឹកនាំដោយលោកស្រី Aung San Suu Kyi បានប្រកាសថា គណបក្សរបស់លោកស្រីទទួលបានកៅអីគ្រប់គ្រាន់ដើម្បីបង្កើតរដ្ឋាភិបាលថ្មី។
នៅក្នុងសេចក្តីប្រកាសរបស់គណបក្ស (NLD) ក្រោយពេលទទួលបានលទ្ធផលរាប់សន្លឹកឆ្នោតក្រៅផ្លូវការ ក្នុងការបោះឆ្នោតកាលពីថ្ងៃទី ៨ខែវិច្ឆិកា បង្ហាញឲ្យឃើញថា គណបក្ស (NLD) ទទួលបានសំឡេងគ្រប់គ្រាន់ដើម្បីបង្កើតរដ្ឋាភិបាលថ្មី។
មានប្រសាសន៍ទៅកាន់សារព័ត៌មានរ៉យទ័រ អ្នកនាំពាក្យគណបក្ស (NLD) លោក Myo Nyunt បានបញ្ជាក់ថា គណបក្សកាន់អំណាចទទួលបានចំនួនកៅអី ៣២២ គ្រប់គ្រាន់ដើម្បីបង្កើតរដ្ឋាភិបាល។ លោកបន្តទៀតថា លោកបានអរគុណដល់ពលរដ្ឋដែលបន្តគាំទ្រ ហើយបោះឆ្នោតជូនគណបក្ស(NLD) ។
នៅវេលាម៉ោង ១៥ ថ្ងៃទី៩ខែវិច្ឆិកាគណៈកម្មាធិការរៀបចំការបោះឆ្នោត មីយ៉ាន់ម៉ាមិនទាន់ប្រកាសពីលទ្ធផលបោះឆ្នោតផ្លូវការនៅឡើយទេ។ ប៉ុន្តែលទ្ធផលក្រៅផ្លូវការតាមមណ្ឌលបោះឆ្នោតបង្ហាញឲ្យឃើញថា គណបក្សកាន់អំណាចនាំមុខជាច្រើន ។
ការបោះឆ្នោតនៅថ្ងៃទី៨ខែវិច្ឆិកា គឺជាការបោះឆ្នោតប្រជាធិបតេយ្យ លើកទី៣ ក្នុងរយៈពេល៦០ឆ្នាំកន្លងមក។ ពលរដ្ឋមីយ៉ាន់ម៉ាជាង៣៧លាននាក់បានទៅបោះឆ្នោត នៅតាមមណ្ឌលបោះឆ្នោតទាំង ៤២.០៤៧កន្លែងទូទាំងប្រទេស។ មានគណបក្សជាង៩០បានចូលរួមក្នុងការបោះឆ្នោតលើកនេះ៕
ដោយ៖ធី រីណា
