សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ នៅថ្ងៃអង្គារទី ១០ ខែវិច្ឆិកា ឆ្នាំ២០២០នេះ ក្រុមការងារឥស្សរជនឆ្នេីមថ្នាក់ជាតិ ដឹកនាំដោយ លោកស្រី ពុំ ចន្ទីនី អនុប្រធានក្រុមការងារឥស្សរជនឆ្នេីមថ្នាក់ជាតិ និងមានកិច្ចសហការជាមួយសាខាកាកបាទក្រហមកម្ពុជា ខេត្តកណ្តាល បានធ្វើការផ្សព្វផ្សាយស្តីពី «ការរស់នៅធម្មតា តាមបែបគន្លងថ្មី » ជូនដល់អ្នកផ្ទុកមេរោគអេដស៍ចំនួន ៤៥នាក់ រស់នៅឃុំដីឥដ្ឋ ឃុំគគីរ ឃុំបន្ទាយដែក ឃុំសំរោងធំ នៃស្រុកកៀនស្វាយ ខេត្តកណ្តាល។ ពិធីនេះប្រព្រឹត្តទៅនៅភូមិស្តៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្តាល។
ក្នុងឱកាសនោះ លោកស្រី ពុំ ចន្ទីនី បានពាំនាំនូវប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ឥស្សរជនឆ្នេីមថ្នាក់ជាតិនៃវេទិកាភាពជាអ្នកដឹកនាំតំបន់អាស៊ី-ប៉ាស៊ីហ្វិក ឆ្លេីយតបមេរោគអេដស៍ ជំងឺអេដស៍ និងការអភិវឌ្ឍនៅកម្ពុជា និងជាប្រធានកាកបាទក្រហមកម្ពុជា ដែលផ្តាំផ្ញេីសួរសុខទុក្ខ ក្តីនឹករលឹក អាណិត ស្រឡាញ់ចំពោះប្រជាពលរដ្ឋទាំងអស់។
ជាមួយគ្នានេះ លោកស្រី អនុប្រធានក្រុមការងារ បានពាំនាំនូវសារអំពាវនាវរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលមានខ្លឹមសារដូចខាងក្រោម ៖
១. សូមក្រុមប្រឹក្សាឃុំសង្កាត់ អាជ្ញាធរដែនដី ស្ថាប័នពាក់ព័ន្ធ និងប្រជាពលរដ្ឋទាំងអស់ បន្តចូលរួមទប់ស្កាត់ជំងឺកូវីដ-១៩ និងឈានទៅបញ្ចប់បញ្ហាអេដស៍នៅឆ្នាំ២០២៥។
២. សូមប្រជាពលរដ្ឋយកចិត្តទុកដាក់គិតគូរថែទាំសុខភាពទាំងផ្លូវកាយ-ផ្លូវចិត្តឱ្យបានរឹងមាំ ជាពិសេសអ្នកផ្ទុកមេរោគអេដស៍ ដែលអាចប្រឈមខ្ពស់ទៅនឹងការឆ្លងជំងឺកូវីដ-១៩ ដោយត្រូវអនុវត្ត «ការស់នៅធម្មតា តាមបែបគន្លងថ្មី» ស្របតាមការណែនាំរបស់ក្រសួងសុខាភិបាល។
៣. សូមស្ត្រីមានផ្ទៃពោះ ទៅពិនិត្យផ្ទៃពោះឱ្យបានទៀងទាត់ និងធ្វេីតេស្តឈាមរកមេរោគអេដស៍ ដេីម្បីបង្ការការឆ្លងមេរោគអេដស៍ពីម្តាយទៅកូន។
៤. សូមអ្នកផ្ទុកមេរោគអេដស៍ទាំងអស់ លេបឱសថប្រឆាំងមេរោគអេដស៍ឱ្យបានទៀងទាត់ និងទទួលការព្យាបាលឱ្យបានត្រឹមត្រូវ ហេីយកុំចម្លងជំងឺទៅកាន់អ្នកដទៃ មិនថាតែជំងឺអេដស៍ ជំងឺគ្រុនផ្តាសាយ ឬជំងឺឆ្លងដទៃទៀតឡើយ។
៥. សូមប្រជាពលរដ្ឋទាំងអស់ បន្តផ្សព្វផ្សាយដល់សមាជិកគ្រួសារ និងប្រជាពលរដ្ឋដទៃទៀតនៅក្នុងសហគមន៍។
នៅក្នុងឱកាសនោះដែរ លោកស្រី មុំ ចន្ធី និងលោក វ៉ា សុភ័ក្ត្រ លេខាក្រុមការងារឥស្សរជនឆ្នេីមថ្នាក់ជាតិ បានធ្វេីការផ្សព្វផ្សាយ ស្តីពី ស្ថានភាពជំងឺអេដស៍ក្នុងពេលបច្ចុប្បន្ន និងសារៈសំខាន់ក្នុងការទប់ស្កាត់ជំងឺកូវីដ-១៩ ជូនដល់ប្រជាពលរដ្ឋទាំងអស់ផងដែរ។
សូមបញ្ជាក់ថា គ្រួសារអ្នកផ្ទុកមេរោគអេដស៍នីមួយៗទទួលបានអំណោយពីកាកបាទក្រហមកម្ពុជា ៖ អង្ករ ៣០គីឡូក្រាម មីយេីង ១កេស ត្រីខ ១០កំប៉ុង ទឹកត្រី ៦ដប ឃីត (ប្រេងឆា អំបិល ស្ករស ទឹកដោះគោ អង្ករ ២គ.ក្រ) ១កញ្ចប់ ឃីត (សារុង ក្រមា មុង ភួយ អាវយឺត) ១កញ្ចប់ និងម៉ាស់ ១ប្រអប់។អំណោយសាខាកាកបាទក្រហមកម្ពុជា ខេត្តកណ្តាលរួមមាន ៖ សាប៊ូ ២ដុំ អាល់កុលកន្លះលីត្រ ១ដប ម៉ាស់ ១០ម៉ាស់ និងថវិកា ៥០.០០០រៀល៕ដោយ៖ស តារា
