សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ នៅថ្ងៃទី ១១ ខែវិច្ឆិកា ឆ្នាំ២០២០នេះក្រសួងសុខាភិបាលម៉ុងហ្គោលី បានរកឃើញករណីឆ្លងជាសហគមន៍លើកទីមួយ ភ្លាមៗនោះ អាជ្ញាធរម៉ុងហ្គោលី បានបញ្ជាឲ្យបិទរដ្ឋធានីអ៊ូឡង់បាទ័រ ដែលមានករណីឆ្លងទាំងស្រុងចំនួន៣ថ្ងៃ ដើម្បីទប់ស្កាត់ការរាលដាល។
ជាក់ស្តែង រដ្ឋមន្ត្រីសុខាភិបាលម៉ុងហ្គោលី Munkhsaikhan Togtmol ក្នុងសន្និសីទព័ត៌មានមួយ នៅថ្ងៃទី១១ ខែវិច្ឆិកានេះ បានបញ្ជាក់ថា ស្ត្រីម្នាក់ដែលរស់នៅរដ្ឋធានីអ៊ូឡង់បាទ័រ បានឆ្លងពីប្ដីអ្នកស្រី ដែលជាអ្នកបើករថយន្តដឹកទំនិញពីប្រទេសរុស្ស៊ី។ បុរសរូបនេះបានតេស្តវិជ្ជមានកូវីដ-១៩ ក្រោយធ្វើចត្តាឡីស័កបាន២១ថ្ងៃ។ ជាមួយគ្នានេះ មនុស្ស២៤នាក់ផ្សេងទៀតដែលប៉ះពាល់ដោយផ្ទាល់ជាមួយប្ដីប្រពន្ធទាំងពីរនាក់នេះ ក៏ត្រូវធ្វើចត្តាឡីស័កផងដែរ។
អាជ្ញាធរម៉ុងហ្គោលី បានដាក់ចេញបញ្ជាឲ្យបិទទីក្រុងអ៊ូឡង់បាទ័រ ដែលមានប្រជាជនរស់នៅជាង១,៥លាននាក់នេះរយៈពេល៣ថ្ងៃ ហើយសាលារៀនក៏ត្រូវបិទទ្វារផងដែរ។ ម្យ៉ាងទៀត ក្រសួងសុខាភិបាលម៉ុងហ្គោលី ក៏បានទទូចឲ្យអ្នកទៅលេងកម្មវិធីតន្ត្រីមួយ ដែលប្តីប្រពន្ធកើតកូវីដ-១៩ ទាំងពីរនាក់បានចូលរួមដែរនោះ នាំគ្នាទៅធ្វើតេស្តជំងឺកូវីដ-១៩ ដូចគ្នា។នេះបើតាមការចុះផ្សាយរបស់ទីភ្នាក់ងារព័ត៌មាន Reuters ។
រដ្ឋាភិបាល ម៉ុងហ្គោលី ទទួលបានការកោតសរសើរសម្រាប់វិធានការទប់ស្កាត់ជំងឺរាតត្បាតសកលកូវីដរបស់ពួកគេ។ ប្រទេសអាស៊ីបូព៌ានេះ បានបិទព្រំដែនភាគខាងត្បូងរបស់ខ្លួនជាមួយប្រទេសចិន ក្នុងចុងខែមករា ហើយបានប្រញាប់បិទសាលារៀន និងទីកន្លែងសាធារណៈដទៃទៀត។
ដោយឡែកលោក Tedros Adhanom Ghebreyesus អគ្អគ្គនាយកអង្គការសុខភាពពិភពលោក WHO តាមរយៈTwitter កាលពីសប្ដាហ៍មុន បានសរសើររដ្ឋាភិបាលម៉ុងហ្គោលីសម្រាប់បង្ហាញពិភពលោកថា ការអនុវត្តតាមការណែនាំសុខាភិបាល ពិតជាអាចទប់ស្កាត់ការរាលដាលជំងឺកូវីដ-១៩មែន។
បច្ចុប្បន្ន បើគិតត្រឹមថ្ងៃទី ១១ ខែវិច្ឆិកានេះ ម៉ុងហ្គោលី មានករណីឆ្លងសរុប ៣៧៦ករណី ខណៈគ្មានអ្នកស្លាប់ឡើយ៕
ដោយ៖ស តារា
