សារព័ត៌មាន នគរវត្ត តែងតែនាំមុខគេជានិច្ច
មន្ត្រីPuerto Rico របស់អាមេរិក បានប្រកាសថាបានរកឃើញមានវ៉ាលិស ដល់ទៅ១២៦វ៉ាលិសដាក់សន្លឹកឆ្នោត មិនទាន់រាប់ត្រូវគេទុកចោលនៅថ្ងៃទី ១០ ខែវិច្ឆិកា។
លោក Francisco Rosado ប្រធានគណៈកម្មាធិការរៀបចំការបោះឆ្នោត Puerto Rico បានឲ្យដឹងថា វ៉ាលិសទាំងអស់នោះគឺបានរក្សាយ៉ាងសុវត្ថិភាព ។ លោកបន្តទៀតថា មូលហេតុបណ្តាលឲ្យមានវ៉ាលិសន្លឹកឆ្នោតទុកចោលគឺដោយសារតែខ្វះការវិនិយោគ ខ្វះធនធានមនុស្ស ។ ចំណែកចំនួនសន្លឹកឆ្នោតបោះមុនពេលកំណត់ច្រើន ក៏ដូចជាការបោះឆ្នោតតាមប្រៃសណីយ៍។
លោកFrancisco Rosado បានបញ្ជាក់ថា«យើងពិតជាសោកស្តាយដែលឃើញសន្លឹកឆ្នោតនៅក្នុងឃ្លាំង។ សន្លឹកឆ្នោត ដាក់ខុសកន្លែង នោះជាការណ៍ពិត»។ លោកបន្តទៀតថា មានវ៉ាលិសសន្លឹកឆ្នោតសរុបដល់ទៅ ១២៦ ក្នុងនោះមាន វ៉ាលិសមួយចំនួនមានសន្លឹកឆ្នោតតិចជាង១០ និងវ៉ាលិសមួយចំនួនទៀតមានសន្លឹកឆ្នោតដល់ទៅ៥០០។
Puerto Rico ស្ថិតនៅក្នុងការគ្រប់គ្រងរបស់អាមេរិក ប៉ុន្តែពលរដ្ឋនៅទីនោះមិនមានសិទ្ធិក្នុងការបោះឆ្នោតជ្រើសរើសប្រធានាធិបតីឬ សមាជិករដ្ឋសភា ព្រឹទ្ធសភានោះឡើយ ។
ដូច្នេះ វ៉ាលិសដែលគេរកឃើញ មិនប៉ះពាល់ដល់លទ្ធផលបោះឆ្នោតប្រធានាធិបតីអាមេរិកឡើយ៕ដោយ៖ធី រីណា
