សារព័ត៌មាន នគរវត្ត តែងតែនាំមុខគេជានិច្ច
ខ្សែប្រយុទ្ធរបស់ក្រុមហង្សក្រហម Liverpool កីឡាករ Mohamed Salah បានធ្វើតេស្តរកឃើញជំងឺកូវីដ-១៩ ក្នុងពេលកំពុងបំពេញកាតព្វកិច្ចប្រកួតអន្តរជាតិជាមួយជម្រើសជាតិអេហ្ស៊ីប។
សមាគមកីឡាបាល់ទាត់អេហ្ស៊ីប (EFA) បាននិយាយកាលពីថ្ងៃសុក្រថាកីឡាករ Mohamed Salah វ័យ២៨ឆ្នាំបានវិលត្រឡប់ទៅរកការធ្វើតេស្តវិជ្ជមាន ប៉ុន្តែមិនបានបង្ហាញរោគសញ្ញាណាមួយឡើយ។ កីឡាករMohamed Salah ឆ្លងកាត់ការសាកល្បងធ្វើតេស្តលើកទី២ ដែលបានបញ្ជាក់ថាគាត់មាន Covid-19 ។
នៅក្នុងសេចក្តីថ្លែងការណ៍មួយ EFA បាននិយាយថា “Salah កំពុងរក្សាស្មារតី និងសុខភាពរឹងមាំ ហើយមិនបង្ហាញរោគសញ្ញាណាមួយនៃជំងឺនេះទេ ខណៈសមាជិកផ្សេងទៀតនៃក្រុមជម្រើសជាតិអេហ្ស៊ីបបានធ្វើតេស្តអវិជ្ជមាន”។
អេហ្ស៊ីបនឹងធ្វើជាម្ចាស់ផ្ទះទទួលស្វាគមន៍ក្រុមជម្រើសជាតិ Togo ក្នុងការប្រកួតជម្រុះពានរង្វាន់ទ្វីបអាហ្រ្វិកនៅថ្ងៃសៅរ៍នេះបន្ទាប់មកត្រូវធ្វើដំណើរទៅកាន់ទឹកដី Togo វិញថ្ងៃអង្គារ។
ឥឡូវនេះ Salah នឹងត្រូវនៅដាច់ដោយឡែកពីគេដោយខកខានការប្រកួត២ប្រកួតបន្ទាប់របស់ក្រុម Liverpool ។ ហង្សក្រហមធ្វើជាម្ចាស់ផ្ទះទទួលក្រុម Leicester នៅ Premier League នៅថ្ងៃអាទិត្យទី២២ ខែវិច្ឆិកានិងការប្រកួត Champions League ទល់នឹង Atalanta នៅ Anfield នាថ្ងៃពុធទី២៥ ខែវិច្ឆិកា។ បច្ចុប្បន្ន Salah បានចាប់ផ្តើមការប្រកួតលីគកំពូលអង់គ្លេសទាំង៨លើកនៅរដូវកាលនេះដោយរកបាន៨គ្រាប់ដែលជាស្ថិតិល្អ ៕
ដោយ៖ភារៈ
