សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ពិតជាគួរឲ្យរន្ធត់ខ្លាំងណាស់ ខណៈដែលយុវជន៣នាក់មានអ្នកខ្លះធ្លាយខួរ ចេញពោះវៀន ខ្ទេចដៃ ខ្ទេចជេីង ស្លាប់ទាំង៣នាក់ បន្ទាប់ពីជិះម៉ូតូមួយគ្រឿងឌុបគ្នាត្រូវរថយន្តដឹកស៊ីម៉ងត៍មកបុកពីក្រោយនិងកិនអូសរាប់សិបម៉ែត្រ បង្កការភ្ញាក់ផ្អើលដល់ប្រជាពលរដ្ឋឃាត់បានតៃកុងរថយន្តបង្កភ្លាមៗ កាលពីវេលាម៉ោង៩និង១០នាទីយប់ ថ្ងៃទី១៤ ខែវិច្ឆិកា ឆ្នាំ២០២០ ស្ថិតនៅតាមបណ្ដោយផ្លូវលេខ២១៧ ក្នុងសង្កាត់ជើងឯក ខណ្ឌដង្កោ រាជធានីភ្នំពេញ។
សមត្ថកិច្ចបានឲ្យដឹងថា សពយុវជនរងគ្រោះទាំង៣នាក់រួមមាន ៖ ទី១-ឈ្មោះ នង វស្សា អាយុ១៨ឆ្នាំ មុខរបរជាកម្មករសំណង់ ស្នាក់នៅសង្កាត់កើតហេតុខាងលើ និងមានស្រុកកំណើតនៅភូមិពោធិរាជ ឃុំពោធិរាជ ស្រុកស្វាយជ្រំ ខេត្តស្វាយរៀង ។ទី២-ឈ្មោះជូ ចេង អាយុ២០ឆ្នាំ មុខរបរជាកម្មករសំណង់ស្នាក់នៅភូមិកើតហេតុខាងលើនិងមានស្រុកកំណើតនៅភូមិដាំបឹង ឃុំស្រីងំ ស្រុកប្រាសាទសំបូរ ខេត្តកំពង់ធំ និងទី៣ -ឈ្មោះគន់ សុខឃឿន អាយុ២០ឆ្នាំ មានស្រុកកំណើតនៅភូមិដាំបឹង ឃុំស្រីងំ ស្រុកប្រាសាទសំបូរ ខេត្តកំពង់ធំ។
តាមប្រភពពីកន្លែងកើតហេតុបានឲ្យដឹងថា មុនពេលកើតហេតុគេឃើញយុវជន៣នាក់ជិះម៉ូតូម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១៨ ពាក់ស្លាកលេខភ្នំពេញ1GX-8455 បានធ្វើដំណើរតាមផ្លូវលេខ២១៧ ក្នុងទិសដៅពីត្បូងទៅជើងក្នុងល្បឿនមធ្យម ខណៈមកដល់ចំណុចកើតហេតុខាងលើក៏មានរថយន្ដដឹកសុីម៉ងត៍មួយគ្រឿង ពណ៌ស ពាក់ស្លាកលេខភ្នំពេញ3D-1148 ធ្វើដំណើរស្របទិសគ្នាក្នុងល្បឿនលឿន ក៏រេចង្កូតទៅបុកម៉ូតូជនរងគ្រោះពីក្រោយបណ្ដាលឲ្យកិនយុវជនទាំង៣នាក់ស្លាប់យ៉ាងអាណោចអាធ័ម។ ចំណែកឯកៃកុងរថយន្ដបង្កត្រូវបានសមត្ថកិច្ចឃាត់ខ្លួនបញ្ជូនទៅប៉ុស្ដិ៍នគរបាលរដ្ឋបាលជេីងឯក ដើម្បីធ្វើការសាកសួរនិងរង់ចាំប្រគល់ឲ្យជំនាញចរាចរណ៍ក្រុងភ្នំពេញ ។
ក្រោយពេលកើតហេតុ សមត្ថកិច្ចមូលដ្ឋានបានទាក់ទងទៅសមត្ថកិច្ចជំនាញដើម្បីធ្វើការវាស់វែងរថយន្ដបង្កនិងម៉ូតូជនរងគ្រោះទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយតាមច្បាប់។ ចំណែកសពជនរងគ្រោះទាំង៣នាក់ក្រោយពីសមត្ថកិច្ចធ្វើកំណត់ហេតុរួច ក៏បានប្រគល់ឲ្យសាច់ញាតិយកទៅធ្វើបុណ្យតាមប្រពៃណី៕ដោយ៖ភារ៉ា ដង្កោ
