សារព័ត៌មាន នគរវត្ត តែងតែនាំមុខគេជានិច្ច
ប្រធានាធិបតីអាមេរិក ដូណាល់ ត្រាំ និងលោកបៃឌិនដែលទើបតែ ជាប់ឆ្នោតប្រធានាធិបតីអាមេរិក បានជូនពរអបអរសាទរនូវជោគជ័យរបស់ SpaceX និង NASA ។
នៅព្រឹកថ្ងៃទី១៦ខែវិច្ឆិកា (ម៉ោងនៅអាមេរិក) អង្កការណាសា និងSpaceX បានរួមគ្នាបំពេញបេសកកម្មបញ្ជូនអវកាសយានិក៤រូបឡើងទៅកាន់ស្ថានីយអវកាសអន្តរជាតិ ក្រោយរយៈពេល២៧ម៉ោងហោះហើរ។
ក្រុមហ៊ុន SpaceX បានសហការជាមួយណាសាបញ្ជូនអវកាសយានិក៤រូប មានជនជាតិ អាមេរិក និងជនជាតិជប៉ុនឡើងទៅកាន់ស្ថានីយអន្តរជាតិISS ។ នេះជាលើកដំបូងដែលណាសាបញ្ជូនក្រុមអវកាសយានិកដោយប្រើប្រាស់យានអវកាសរបស់ក្រុមហ៊ុនឯកជនរបស់អាមេរិក។
រ៉ុក្កែតរុញ Falcon 9 របស់ក្រុមហ៊ុន SpaceX បានចាកចេញពីជើងទម្រនៅវេលាម៉ោង៧និង២៧នាទីយប់(ម៉ោងនៅតំបន់ភាគខាងកើតអាមេរិក) ចេញពីមជ្ឈមណ្ឌលអវកាស Kennedy នៅFlorida អាមេរិក ។ នេះជាលើកដំបូងដែលSpaceX និង NASA បានបញ្ជូនមនុស្ស៤នាក់ឡើងទៅកាន់ស្ថានីយ ISS។
តាមគម្រោងអវកាសយានិក៣រូបរបស់អាមេរិក មានឈ្មោះ Michael Hopkins, Victor Glover និង Shannon Walker រួមជាមួយជនជាតិជប៉ុន Soichi Noguchi នឹងទៅដល់ស្ថានីយ អវកាស ក្រោយការហោះហើរ២៧ម៉ោង។ អ្នកទាំង៤នឹងបំពេញការងាររយៈពេល ៦ខែនៅស្ថានីយISS៕
ដោយ៖ធី រីណា
