សារព័ត៌មាន នគរវត្ត តែងតែនាំមុខគេជានិច្ច
កម្លាំងប៉ូលិសនិងក្រុមបាតុករបានប៉ះទង្គិចគ្នានៅមុខរដ្ឋសភាថៃ ក្នុងពេលក្រុមតំណាងរាស្ត្រកំពុងតែប្រជុំស្តីពីការកែទម្រង់រដ្ឋធម្មនុញ្ញ។
តាមសារព័ត៌មាន CNA នៅថ្ងៃទី១៧ខែវិច្ឆិកា ក្រុមបាតុករថៃបានពាក់មួកការពារ និងសម្ភារការពារផ្សេងទៀត ព្យាយាមឆ្លងរបងការពារ ជុំវិញរដ្ឋសភាដែលកំពុងប្រជុំ។ ក្រុមបាតុករបានគប់គ្រាប់បែកផ្សេងទៅលើកម្លាំងប៉ូលិសទៀតផង ។
កម្លាំងប៉ូលិសក្នុងទីក្រុងបាងកកបានហាមប្រាមពលរដ្ឋចូលកៀក ក្នុងបរិវេណ៥០ម៉ែត្រជុំវិញរដ្ឋសភា។ ប៉ុន្តែក្រុមបាតុករបានព្យាយាមឆ្លងរបងការពារ ក៏ត្រូវកម្លាំងប៉ូលិស រារាំងដោយបាញ់ទឹកដាក់ ។ ជាមួយគ្នានេះ រថយន្តសង្គ្រោះជាច្រើនត្រៀមបញ្ជូនអ្នករងរបួសទៅកាន់មន្ទីរពេទ្យ។
តាមប្រភពព័ត៌មានពីមជ្ឈមណ្ឌលសុខាភិបាលទីក្រុងបាងកកបានឲ្យដឹងថា មានមនុស្ស៤១នាក់រងរបួស ពាក់ព័ន្ធនឹងការធ្វើបាតុកម្ម ។ ក្នុងចំណោមអ្នករងរបួស មាន ១២នាក់របួសដោយឧស្ម័នបង្ហូរទឹកភ្នែក និង៥នាក់ទៀតរបួសដោយគ្រាប់កៅស៊ូ។
ជាមួយគ្នានេះកម្លាំងប៉ូលិស បានច្រានចោលព័ត៌មានថាបានបាញ់គ្រាប់ពិតទៅលើក្រុមបាតុករ។ ក្រៅពីការប៉ះទង្គិចជាមួយប៉ូលិស ក្រុមបាតុករក៏បានប៉ះទង្គិចជាមួយក្រុមបាតុករផ្សេងទៀតដែលគាំទ្រ ព្រះមហាក្សត្រថៃផងដែរ។
បាតុកម្មនៅថៃបានផ្ទុះឡើងតាំងពីដើមខែកក្កដាឆ្នាំ២០២០ មកទល់ពេលនេះ ក្នុងគោលដៅទាមទារឲ្យនាយករដ្ឋមន្ត្រីប្រាយុទ្ធ ចាន់អូចាចុះចេញពីតំណែង ក៏ដូចជាកាត់បន្ថយអំណាចរបស់ព្រះមហាក្សត្រ៕ដោយ៖ភារៈ
