សារព័ត៌មាន នគរវត្ត តែងតែនាំមុខគេជានិច្ច
គណៈកម្មការអឺរ៉ុបបានព្រមព្រៀងជាមួយក្រុមហ៊ុន Moderna ដើម្បីទទួលបានការផ្គត់ផ្គង់វ៉ាក់សាំង ប្រឆាំងកូវីដ-១៩ក្នុងតម្លៃ២៥ដុល្លារអាមេរិកក្នុងមួយដូស។
ជាក់ស្តែង កាលពីថ្ងៃទី១៦ខែវិច្ឆិកាមន្ត្រីសហគមន៍អឺរ៉ុបបានពិភាក្សាព្រមព្រៀងជាមួយក្រុមហ៊ុន Moderna ទៅលើតម្លៃវ៉ាក់សាំង ដែលត្រូវផ្តល់ជូនអឺរ៉ុប។ បច្ចុប្បន្នក្រុមហ៊ុនផលិតវ៉ាក់សាំងModernaបានធ្វើតេស្តដំណាក់កាលចុងក្រោយដោយមាន លទ្ធផលដល់ទៅ៩៤,៥ភាគរយ។
តាមឯកសារផ្ទៃក្នុងរបស់អឺរ៉ុប និងក្រុមហ៊ុនModernaស្តីពីវ៉ាក់សាំង កូវីដ-១៩ បានពិភាក្សាគ្នាតាំងពីខែកក្កដាមកម៉្លេះក្នុងពេលដែលក្រុមហ៊ុនចាប់ផ្តើមធ្វើតេស្តដំណាក់កាលចុងក្រោយ ។ នៅពេលនេះភាគីទាំងពីរបានព្រមព្រៀងគ្នាជាផ្លូវការទាំងតម្លៃ ។
ចំណែកអាមេរិកវិញបានយល់ព្រម ផ្តល់តម្លៃឲ្យក្រុមហ៊ុនModerna ១៥ដុល្លារក្នុងមួយដូស ដោយអាមេរិកព្រមព្រៀងទិញ១០០លានដូសមានតម្លៃ១,៥ពាន់លានដុល្លារ។ កន្លងមកទីក្រុងវ៉ាស៊ីនតោនបានផ្តល់ជូន១ពាន់លានដុល្លារសម្រាប់សកម្មភាពស្រាវជ្រាវនិងផលិតវ៉ាក់សាំងរបស់ក្រុមហ៊ុននេះ។
ក្រុមហ៊ុនModerna បានក្លាយជាអ្នកផ្គត់ផ្គង់ទីពីរដែលទទួលបានលទ្ធផលលើសពីការរំពឹងទុក។ កន្លងមក ក្រុមហ៊ុនPfizer និង BioNTech ក៏បានប្រកាសថាវ៉ាក់សាំងរបស់ខ្លួនមានប្រសិទ្ធភាពជាង៩០ភាគរយដែរ។
ជាមួយនឹងលទ្ធផលជោគជ័យជាបន្តបន្ទាប់ គឺជាក្តីសង្ឃឹមនៅដើមឆ្នាំ២០២១នេះនឹងមានវ៉ាក់សាំងប្រឆាំងកូវីដ-១៩ប្រើប្រាស់ហើយ។វិស័យទាំងអស់នឹងត្រូវដំណើរការវិញដូចដើម ព្រំដែនប្រទេសទាំងអស់នឹងត្រូវបើកស្វាគមន៍អ្នកទេសចរ ៕ដោយ៖ធី រីណា
