សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្លាំងសមត្ថកិច្ចប៉ុស្តិ៍នគរបាលទន្លេបាសាក់ សហការជាមួយនឹងកម្លាំងជំនាញខណ្ឌបានធ្វើការឃាត់ខ្លួនជនសង្ស័យប្រុសស្រីចំនួន៩នាក់រួមទាំងគ្រឿងញៀនចំនួន១៦កញ្ចប់តូច។
ហេតុការណ៍នេះកើតឡើងកាលពីវេលាម៉ោង៣រំលងអធ្រាត្រឈានចូលថ្ងៃទី១៩ ខែវិច្ឆិកា ឆ្នាំ២០២០ នៅចំណុចផ្លូវអត់លេខ ម្តុំផ្សាររន្ទះបាញ់ ភូមិ១៦ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
ជនសង្ស័យប្រុសស្រីចំនួន៩នាក់ដែលត្រូវសមត្ថកិច្ចឃាត់ខ្លួននោះនៅមិនទាន់បានស្គាល់អត្តសញ្ញាណនៅឡើយទេ គឺ គ្រាន់តែដឹងថាដកហូតបានម្សៅក្រាមពណ៌សរថ្លាចំនួន១៦កញ្ចប់តូច ដាវមួយដេីម ឧបករណ៍សម្រាប់ប្រើប្រាស់គ្រឿងញៀនមួយចំនួន និងម៉ូតូម៉ាកស៊ុយហ្ស៊ុយគីនិច ពណ៌ស ពាក់ស្លាកលេខ ភ្នំពេញ 1IF-1052 មួយគ្រឿង ។
សមត្ថកិច្ចបានឱ្យដឹងថា មុននឹងឈានទៅដល់ការឃាត់ខ្លួនជនសង្ស័យប្រុសស្រី ចំនួន៩នាក់នេះបាន គឺកម្លាំងសមត្ថកិច្ចប៉ុស្តិ៍នគរបាលទន្លេបាសាក់បានរួមសហការជាមួយនឹងកម្លាំងជំនាញខណ្ឌចំការមនចុះល្បាតទប់ស្កាត់បទល្មើសផ្សេងៗក្នុងមូលដ្ឋាន ហេីយពេលនោះក៏ស្រាប់តែឃេីញបុរស២នាក់ជិះម៉ូតូម៉ាកស៊ុយហ្ស៊ុុយគីនិច ពណ៌ស ពាក់ស្លាកលេខ ភ្នំពេញ 1IF-1052 នៅផ្លូវ សុធារស ម្តុំកុងតឺន័រថ្មី កម្លាំងសមត្ថកិច្ចក៏ឃាត់ដេីម្បីសុំធ្វើការឆែកឆេរត្រួតពិនិត្យ តែជនសង្ស័យទាំង២នាក់នោះមិនព្រមឈប់ ក៏បានជិះម៉ូតូរត់គេចចូលទៅក្នុងម្តុំផ្សាររន្ទះបាញ់ ហើយពេលនោះដែរ សមត្ថកិច្ចបានដេញតាមដល់មុខផ្ទះជនសង្ស័យធ្វើឱ្យពួកគេភ័យបានផ្តួលម៉ូតូ រត់គេចចូលទៅក្នុងផ្ទះ ទេីបកម្លាំងសមត្ថកិច្ចប៉ុស្តិ៍បានស្នើសុំកម្លាំងអន្តរាគមន៍ខណ្ឌជួយ និងធ្វើការឆែកឆេរ ទីតាំងខាងលើ ហើយបានរកឃើញម្សៅក្រាមពណ៌សរថ្លាចំនួន១៦កញ្ចប់តូច សង្ស័យជាសារធាតុញៀន និងដាវសាមូរ៉ៃ១ដេីម ព្រមទាំងបានធ្វើការឃាត់ខ្លួនជនសង្ស័យមានប្រុសមានស្រីជាបន្តបន្ទាប់ចំនួន៩នាក់ទៀតផង។
ក្រោយពេលកេីតហេតុ បន្ទាប់ពីធ្វើការ ឆែកឆេរត្រួតពិនិត្យរួចរាល់ហើយ ជនសង្ស័យរួមទាំងវត្ថុតាងត្រូវបានកម្លាំងសមត្ថកិច្ចបញ្ជូនខ្លួនទៅអធិការដ្ឋានគរបាលខណ្ឌចំការមនដេីម្បីសាកសួរនិងចាត់ការបន្តតាមនីតិវិធី៕ ដោយ រ៉ារ៉ា
