សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តវីអាយភីដឹកអ្នកដំណើរបើកលឿនមិនប្រយ័ត្នជ្រុលទៅបុកពីក្រោយរថយន្តស្ទូចពេញទំហឹងបណ្ដាលឲ្យគាបជាប់មនុស្ស៤នាក់រងរបួសធ្ងន់និងស្រាលត្រូវបានបញ្ជូនទៅសង្គ្រោះភ្លាមៗនៅមន្ទីរពេទ្យ។
ហេតុការណ៍នេះបានកើតឡើងនៅម៉ោង ១១និង៣០នាទីយប់ថ្ងៃទី១៨ ខែវិច្ឆិកា ឆ្នាំ២០២០ ស្ថិតនៅតាមបណ្ដោយផ្លូវជាតិលេខ ៦ ក្នុងសង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ។
ប្រភពព័ត៌មានពីប្រជាពលរដ្ឋនៅកន្លែងកើតហេតុបានឲ្យដឹងថា មុនកើតហេតុគេឃើញរថយន្តដឹកអ្នកដំណើរវីអាយភីរបស់ក្រុមហ៊ុនកាពីតូលមួយគ្រឿងពាក់ស្លាកលេខ ភ្នំពេញ 2AC-0590 ធ្វើដំណើរតាមផ្លូវជាតិលេខ៦ក្នុងទិសដៅពីកើតទៅលិច ខណៈមកដល់ចំណុចកើតហេតុក៏មានរថយន្តស្ទូចមួយគ្រឿងអត់មានស្លាកលេខ បើកតាមផ្លូវជាតិលេខ៦ក្នុងទិសដៅស្របគ្នាបម្រុងនឹងបត់ចូលបុរីរថយន្តវីអាយភីដឹកអ្នកដំណើរក៏ជ្រុលទៅបុកពីក្រោយពេញទំហឹងបណ្តាលឲ្យផ្ទប់គាបជាប់មនុស្សប្រុសស្រី ៤ នាក់រងរបួសធ្ងន់និងស្រាលនៅក្នុងរថយន្តត្រូវប្រជាពលរដ្ឋ និងសមត្ថកិច្ចជួយគាស់យកចេញទៅសង្គ្រោះបន្ទាន់ភ្លាមៗ។
បន្ទាប់ពីកើតសមត្ថកិច្ចបានចុះមកដល់កន្លែងកើតហេតុរួចបានទំនាក់ទំនងទៅសមត្ថកិច្ចជំនាញចរាចរណ៍ចុះមកវាស់វែងយករថយន្តទាំងពីរគ្រឿងទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញរង់ចាំដោះស្រាយគ្នានៅពេលក្រោយ៕
ដោយ៖ជ្រោយពេជ្រ
