ព័ត៌មានទាន់ហេតុការណ៍៖

អាហ្វ្រិកខាងលិចប្រឈមនឹងគ្រោះអត់ឃ្លានដោយសារតែសង្គ្រាមនិងអំពើហិង្សា​

ចែករំលែក៖

សារព័ត៌មាន​TTXVN ប្រចាំនៅទ្វីបអាហ្វ្រិក បានដកស្រង់​របាយការណ៍ របស់ក្រុមអ្នកឯកទេសស្តីពីកិច្ចសហប្របតិបត្តិការសន្តិសុខស្បៀងអាហារ ប្រចាំតំបន់អាហ្វ្រិក ដែលបានឲ្យដឹងថា គ្រោះអត់ឃ្លាននៅ Sahel និងអាហ្វ្រិកខាងលិច បានកើនឡើងខ្ពស់ដោយសារតែ​សង្គ្រាមស៊ីវិល និងអំពើហិង្សា​។
តាមតួលេខដែលបានប្រកាសនៅថ្ងៃទី​៣ខែធ្នូ របស់ធនាគារពិភពលោក និង អង្គការសហប្រជាជាតិ ព្រមទាំងអង្គការក្រៅរដ្ឋាភិបាល បានបង្ហាញឲ្យឃើញថា ​ ចាប់ពីខែតុលា មកទល់ពេលនេះ មានពលរដ្ឋអាហ្វ្រិកខាងលិច​ដល់ទៅ​១៦,៧​លាននាក់ ធ្លាក់ក្នុងស្ថានភាពខ្វះស្បៀងអាហារ​។ ប្រសិនបើមិនមានវិធានការទប់ស្កាត់ទេនោះ នឹងមានពលរដ្ឋដល់ទៅ​២៤លាននាក់ អត់អាហារបរិភោគ​។
កាលពីសប្តាហ៍កន្លងមក​ក្រុមឧទ្ទាម​Boko Haram បានបើកការវាយប្រហារសម្លាប់កសិករ​៧៦នាក់ នៅតំបន់ភាគ​ឦសាននៃប្រទេសនីហ្សេរីយ៉ា​ ចំពេលដែលពលរដ្ឋ​ត្រៀមប្រមូលផលស្រូវ​។
លោកYan Saint-Pierre​ អគ្គនាយកនៃ​មជ្ឈមណ្ឌល​វិភាគសន្តិសុខរបស់ក្រុមហ៊ុន​Modern Security Consulting Group បានឲ្យដឹងថា អំពើហិង្សាបង្កឡើងដោយក្រុមភេរវកម្ម បង្ខំឲ្យពលរដ្ឋ​ដល់ទៅ៤​លាននាក់ត្រូវភៀសខ្លួនទៅរស់នៅតំបន់ផ្សេង​។ នៅក្នុងប្រទេសនីហ្សេរីយ៉ា មានពលរដ្ឋដល់ទៅ​១២,៩ លាននាក់ប្រឈមនឹងគ្រោះអត់ឃ្លាននៅក្នុងរដូវប្រាំងឆ្នាំនេះ​។ បច្ចុប្បន្នមានពលរដ្ឋ​៩,២លាននាក់ប្រឈមនឹងការអត់អាហារ​។ ក្រៅពីនេះនៅមាន ប្រទេស Burkina Faso មានពលរដ្ឋ​២,៧លាននាក់ប្រឈមគ្រោះអត់ឃ្លាន ៕ដោយ៖ធី រីណា


ចែករំលែក៖