សារព័ត៌មាន នគរវត្ត តែងតែនាំមុខគេជានិច្ច
ឆ្នាំ២០២០ គឺជាពេលវេលាលំបាកបំផុតសម្រាប់ប្រទេសជុំវិញពិភពលោក ដោយសារតែការឆ្លងរាលដាលកូវីដ-១៩។ ជាមួយគ្នានោះសេដ្ឋកិច្ចបណ្តាប្រទេសក៏ត្រូវធ្លាក់ចុះផងដែរ ដោយសារតែការបិទប្រទេស។ ប៉ុន្តែវិស័យឧស្សាហកម្មសព្វាវុធរបស់អាមេរិកនៅតែដំណើរការល្អ ដោយអាមេរិកលក់អាវុធទៅឲ្យប្រទេសជាសម្ពន្ធមិត្ត នាំមកនូវប្រាក់ចំណូលដល់ទៅ១៧៥ពាន់លានដុល្លារ គឺកើនឡើងដល់ទៅ២,៨ភាគរយបើប្រៀបធៀបនឹងឆ្នាំ២០១៩។
កាលពីថ្ងៃទី៤ខែធ្នូ មន្ទីរបញ្ចកោណអាមេរិក បានប្រកាសឲ្យដឹងថា រដ្ឋាភិបាលបានអនុម័តលក់អាវុធទៅឲ្យប្រទេសជាសម្ពន្ធមិត្តមានតម្លៃជាង១៧៥ពាន់លានដុល្លារ គិតក្នុងរយៈពេលពីថ្ងៃទី១ខែតុលាឆ្នាំ២០១៩ ដល់ថ្ងៃទី ៣០ខែកញ្ញាឆ្នាំ២០២០ គឺកើនដល់ទៅ៥ពាន់លានដុល្លារប្រើប្រៀបធៀបឆ្នាំ២០១៩។
សារព័ត៌មានរ៉យទ័របានផ្សាយថា ប្រាក់ចំណូលភាគច្រើនបានពីការលក់យន្តហោះចម្បាំង កាំជ្រួចមីស៊ីលនាំផ្លូវ។ ប្រទេសជាច្រើនជុំវិញពិភពលោក ចង់ទិញអាវុធពីក្រុមហ៊ុនLockheed Martin និង Raytheon របស់អាមេរិក ។
ជប៉ុនជាប្រទេសដែលទិញអាវុធពីអាមេរិកច្រើនបំផុតនៅក្នុងឆ្នាំ២០២០ ដោយបានបញ្ជាទិញយន្តហោះអាមេរិកដល់ទៅ៦៣គ្រឿងប្រភេទ F-35 ពីក្រុមហ៊ុនLockheed Martin មានតម្លៃ ២៣ពាន់លានដុល្លារ ។ ក្រៅពីនេះគឺប្រទេសនៅតំបន់មជ្ឈិមបូព៌ា និងអារ៉ាប់ ដែលមានអារ៉ាប៊ីសាអ៊ូឌីតជាដើម៕ ធី រីណា
