សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ បុរសម្នាក់ស្លាប់នៅនឹងកន្លែងដោយសារគ្រោះថ្នាក់ចរាចរណ៍ ចំណែកភាគីរថយន្តរត់គេចខ្លួនបាត់ស្រមោលដោយទុករថយន្តនៅកន្លែងកើតហេតុ។
ហេតុការណ៍នេះ បានកើតឡើងនៅវេលាម៉ោង៨និង៣០នាទីយប់ ថ្ងៃទី០៦ ខែធ្នូ ឆ្នាំ២០២០ ត្រង់ទល់មុខស្ថានីយ៍ជញ្ចីងថ្លឹងរថយន្តរលួសលើកំណាត់ផ្លូវជាតិលេខ៦ ស្ថិតនៅចំណុចភូមិរលួសលិច ឃុំរលួស ស្រុកប្រាសាទបាគង ខេត្តសៀមរាប ។
ប្រភព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញមានម៉ូតូ១គ្រឿង បានជិះមិនប្រកាន់ស្តាំ ទៅបុកជាមួយរថយន្តកាមរីមួយគ្រឿងទៀត បណ្តាលឱ្យអ្នកបើកបរម៉ូតូស្លាប់នៅនឹងកន្លែង។ ចំណែកភាគីរថយន្តចុះរត់គេចខ្លួនបាត់ស្រមោល។
រថយន្តក្នុងគ្រោះថ្នាក់នោះ ម៉ាកតូយ៉ូតាកាមរីបាឡែន ពណ៌ទឹកមាស ពាក់ស្លាកលេខ សៀមរាប ២C ៥២១៦ អ្នកបើកបររត់បាត់ ដោយបើកបរពីលិចទៅកើតមកដល់ចំណុចកើតហេតុបានទៅបុកជាមួយ នឹងម៉ូតូម៉ាក MSX ពណ៌ស ពាក់ស្លាកលេខ សៀមរាប ១AJ ៧៩៧៥ បើកបរដោយបុរសម្នាក់ឈ្មោះព្រីង សុភេទ អាយុ៣៦ឆ្នាំ រស់នៅភូមិគោគស្រុក ឃុំរលួស ស្រុកប្រាសាទបាគង ខេត្តសៀមរាប បណ្តាលឲ្យស្លាប់នៅនឹងកន្លែង ដោយគាត់បើកបរពីទិសកើតទៅលិច មិនប្រកាន់ស្តាំ។
ក្រោយមកសមត្ថកិច្ចជំនាញបានទៅដល់វាស់វែងរួចបានប្រគល់សាកសពឲ្យក្រុមគ្រួសារយកទៅធ្វើបុណ្យតាមប្រពៃណី។
រីឯរថយន្តនិងម៉ូតូបានរក្សាទុកនៅអធិការដ្ឋាននគរបាលស្រុករង់ចាំការដោះស្រាយតាមច្បាប់នៅពេលក្រោយ៕
ដោយ៖ប្រាថ្នា
