សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ គេបានស្គាល់អត្តសញ្ញាណប៉ូលិសដែលបាញ់មនុស្សឆៅៗហើយ គឺប៉ូលិសស័ក្តិ៤ ឈ្មោះ កេត ផារ៉េន នៅក្រសួងមហាផ្ទៃ បានបាញ់២គ្រាប់ បណ្តាលអោយមួយគ្រាប់ត្រូវលើយុវជនម្នាក់ ចំជើងស្តាំ និង មួយគ្រាប់ទៀត ផ្លាតចំទ្វារកញ្ចក់ផ្ទះអ្នកដទៃ បែកខ្ទេចខ្ទី ។ ក្រោយបង្កហេតុ ជនដៃដល់ បានបើកឡានគេចខ្លួនបាត់ស្រមោល ។
សូមបញ្ជាក់ថា ហេតុការណ៍បាញ់ប្រហារនេះ បាន កើតឡើងកាលពីវេលាម៉ោងជាង៩យប់ ថ្ងៃទី៩ ខែធ្នូ ឆ្នាំ២០២០ នៅចំណុចផ្លូវលេខ៣៧១ ក្នុងសង្កាត់បឹងទំពុន២ ខណ្ឌមានជ័យ ជាប់ព្រំប្រទល់ សង្កាត់ដង្កោ ខណ្ឌដង្កោ ។
ជនរងគ្រោះឈ្មោះ ប៊ុន ស៊ីម អាយុ៣៩ឆ្នាំ ថ្លែងប្រាប់ក្រុមអ្នកសារព័ត៌មាន នៅកន្លែងកើតហេតុ ថា មុនពេលកើតហេតុ គាត់មានគ្នា៤នាក់ ជិះម៉ូតូចេញពីញាំអីនៅម្ដុំបឹងត្របែក រួចបានជូនមិត្តភក្តិមកផ្ទះនៅកន្លែងកើតហេតុ។
លោកបន្តថា ខណៈមកដល់មុខផ្ទះមួយភ្លេត ស្រាប់តែលេចមុខជនដៃដល់ដែលធ្លាប់ស្គាល់គ្នាតែមិនសូវជិតស្និត បានចុះពីលើរថយន្តមិនចាំម៉ាក ហើយដើរឆ្លងផ្លូវមកសួរនាំមិត្តភក្តិគាត់ រួចក៏ដើរទៅជិះរថយន្តរបស់ខ្លួនវិញនៅលើផ្លូវ៣៧១ ក្នុងសង្កាត់បឹងទំពុន២ ខណ្ឌមានជ័យ ។
ក្រោយមក ជនដៃដល់ បានបើកកញ្ចក់រថយន្ត ដកកាំភ្លើងខ្លីបាញ់សំដៅមកលើជនរងគ្រោះដែលនៅផ្លូវម្ខាងទៀត ក្នុងសង្កាត់ដង្កោ ខណ្ឌដង្កោ ចំនួន២គ្រាប់ ដោយមួយគ្រាប់ចំជើងខាងស្ដាំ និង មួយគ្រាប់ទៀតចំទ្វារកញ្ចក់មួយផ្ទាំងបែកខ្ទេចខ្ទី រួចហើយក៏បើករថយន្តគេចខ្លួនបាត់ ។ ចំណែកជនរងគ្រោះក៏ប្រញាប់ទៅមន្ទីពេទ្យដើម្បីពិនិត្យ និងលាងរបួសភ្លាមៗផងដែរ ។
ជនរងគ្រោះ បន្តថា មួយសន្ទុះក្រោយមក ខ្លួនបានមកកន្លែងកើតហេតុវិញ ទើបបង្កការភ្ញាក់ផ្អើលដល់អ្នកសារព័ត៌មានជាច្រើនចុះមកផ្ដិតយករូបភាព និង Live ទើបដឹងឮដល់សមត្ថកិច្ចប៉ុស្ដិ៍នគរបាលបឹងទំពុន២ និងសមត្ថកិច្ចប៉ុស្ដិ៍នគរបាលដង្កោ ចុះមកដល់កន្លែងកើតហេតុ ។
អ្វីជាការកត់សម្គាល់ នោះ គឺ សមត្ថកិច្ចប៉ុស្តិ៍បឹងទំពុនទី២ និង សមត្ថកិច្ចប៉ុស្តិ៍ដង្កោ បានរុញដាក់គ្នា ព្រោះកន្លែងកើតហេតុ មិនច្បាស់លាស់ ។ ប៉ុន្តែបន្តិចក្រោយមក កម្លាំងគរបាលទាំងពីរប៉ុស្ដិ៍ បានណែនាំជនរងគ្រោះឲ្យទៅដាក់ពាក្យបណ្ដឹងនៅប៉ុស្តិ៍មួយណាក៏បានដែរ។
ចំណែកជនរងគ្រោះ បានសម្រេចចិត្តទុកសម្បកកាទុស្ស ដែលរកឃើញនៅកន្លែងកើតហេតុ១គ្រាប់ រង់ចាំទៅដាក់ពាក្យបណ្ដឹងនៅមូលដ្ឋានកងរាជអាវុធហត្ថរាជធានីភ្នំពេញ វិញ ។
ពេលនេះជនសង្ស័យ ត្រូវបានគេស្គាល់អត្តសញ្ញាណហើយ សង្ឃឹមថា កម្លាំងកងរាជអាវុធហត្ថរាជធានីភ្នំពេញ និងសមត្ថកិច្ចផ្សេងទៀត ក្នុងនាមជាមន្ត្រីនគរបាលយុត្តិធម៌ អាចក្តាប់ មុខសញ្ញានេះ ដើម្បីឃាត់ខ្លួនតាមជំនាញ និងផ្តល់យុត្តិធម៌ដល់ជនរងគ្រោះ ខណះប្រទេសយើងគ្រប់គ្រងដោយច្បាប់ ហើយជនសង្ស័យក៏ជាមន្ត្រីអនុវត្តន៍ច្បាប់ មិនត្រូវប្រព្រឹត្តបទល្មើសក្នុងសង្គមបែបនេះដែរ៕
ដោយ៖ សិលា
