សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សាយ បានធ្វើឲ្យមហាជនស្ញប់ស្ញែងច្រើនអំពីការលះបង់ដ៏ធំធេញនៃការយកថ្ងៃខួបកំណើតដោយរត់សុរបចំនួនចំនួន៩៩ថ្ងៃពោលគឺរត់ជុំវិញប្រទេសកម្ពុជាក្នុងមួយថ្ងៃប្រមាណ៤០គីឡូម៉ែត្រ។ កម្មវិធីរត់ជុំវិញប្រទេសកម្ពុជា ១ដុល្លារ ដើម្បីកុមារកម្ពុជា ដែលធ្លាប់បានធ្វើឲ្យរំជួលចិត្តមហាជនជាច្រើននោះពេលនេះតារាចម្រៀងសាយ បានបន្ថែមChallenge ថ្មីមួយទៀតគឺ ២$ ដើម្បីវ៉ាក់សាំងកូវីដ–១៩ មួយលានដូសសម្រាប់កម្ពុជា។
អស់រយៈពេលជាង២ខែកន្លងមកហើយដើម្បីរៃអង្គាសមូលនិធិជួយដល់កុមារនៅមន្ទីរពេទ្យកុមារអង្គរនោះ ដែលថវិកាសរុបនៃកម្មវិធីរត់ដើម្បីសប្បុរសធម៌ជាមួយសាយ ដែលគិតត្រឹមថ្ងៃនេះ គឺបានជាង១.៧០០លានរៀលហើយ។ តាមការបញ្ជាក់នៅលើវីដេអូផ្សាយផ្ទាល់លើទំព័រហ្វេសប៊ុកផ្លូវការរបស់ខ្លួនថាយុទ្ធនាការនេះ បង្កើតឡើងដើម្បីរួមចំណែកជាមួយរាជរដ្ឋាភិបាលកម្ពុជា ក្នុងការទិញវ៉ាក់សាំងការពារជំងឺកូវីដ–១៩ ជូនដល់ប្រជាជនកម្ពុជា ជាពិសេសអ្នកដែលប្រឈមនឹងជំងឺនេះខ្លាំង។ មិនខុសពី Challenge “១ដុល្លារ ដើម្បីកុមារកម្ពុជា” នោះទេ, Challenge ថ្មីនេះ គឺឈរលើគោលការណ៍ ការចូលរួមម្នាក់បន្តិច ដើម្បីទាំងអស់គ្នា។សាយ បានបញ្ជាក់ថា ដើម្បីឆ្លងផុតពីពេលវេលាដ៏លំបាកនេះទាមទារការចូលរួមពីទាំងអស់គ្នា ដែលសាយ បានសង្កត់ធ្ងន់ថា៖ “សូមឲ្យយើងទាំងអស់គ្នា គិតថាខ្លួនយើង គឺជាចំណែកមួយនៃដំណោះស្រាយ“ ។ ថ្ងៃទី១៣ ខែធ្នូ សាយបានរត់មកដល់ក្រុងបានលុងខេត្តរតនគិរីហើយ ពោលគឺបានជាង ១ពាន់គីឡូម៉ែត្រហើយ នៃដំណើរផ្លូវក្នុងកម្មវិធី RUN WITH SAI។ ដើម្បីចូលរួមក្នុង Challenge ថ្មីនេះប្រិយមិត្តគ្រាន់តែបរិច្ចាគថវិកា ២ដុល្លារ (ឬច្រើនជាងនេះក៏បាន)ទៅកាន់គណនីយមួយចំនួនដែលរាជរដ្ឋាភិបាលបានប្រកាសកន្លងមក រួច screenshot បង្ហោះលើគណនីបណ្ដាញសង្គមរបស់ខ្លួន រួមជាមួយរូបភាព Artwork លេខគណនីធនាគារ និង Tag មិត្តភក្ដិរបស់អ្នកចំនួន ១០នាក់ ដើម្បីចូលរួមយុទ្ធនាការនេះ៕
ដោយ៖ វឌ្ឍនា
