សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ មនុស្សប្រុសស្រី៣នាក់បានរងរបួសធ្ងន់និងស្រាល ហេីយត្រូវរថយន្តសង្គ្រោះបន្ទាន់របស់គ្លីនិកឯកជនដឹកយកទៅកាន់មន្ទីរពេទ្យភ្លាមៗ បន្ទាប់ពីពួកគាត់ជិះម៉ូតូឌុបគ្នាដេញតាមចោរឆក់ខ្សែកនៅតាមផ្លូវបេតុងខាងក្រោយសាលារៀនណតឡាញ ក្នុងសង្កាត់ស្ទឹងមានជ័យ១ ខណ្ឌមានជ័យ ហេីយជិះបញ្ច្រាសទិសចរាចរណ៍តាមចោរឆក់បានជ្រុលទៅបុកឡំប្រឺតាដែលកំពុងធ្វេីដំណេីរតាមផ្លូវលេខ២១៧ ក្នុងសង្កាត់ស្ទឹងមានជ័យ២ ខណ្ឌមានជ័យ ចំពីមុខពេញទំហឹងកាលពីវេលាម៉ោង១១ និង០៥នាទីយប់ ថ្ងៃទី១៨ ខែធ្នូ ឆ្នាំ២០២០ ។
តាមប្រភពព័ត៌មានពីប្រជាពលរដ្ឋដែលឃេីញហេតុការណ៍ខាងលេីបានឲ្យដឹងថា មុនកេីតហេតុ គេឃេីញម៉ូតូ២គ្រឿង ដែល១គ្រឿងមិនចាំម៉ាកជិះដោយបុរសម្នាក់ធ្វេីដំណេីរចេញពីផ្លូវបេតុងខាងក្រោយសាលារៀនណតឡាញ ក្នុងទិសដៅពីជេីងទៅត្បូងក្នុងល្បឿនលឿន ហេីយឆ្លងកាត់ផ្លូវព្រះមុនីរ៉េតមកបញ្ច្រាសចរាចរណ៍ ក្នុងនោះក៏មានម៉ូតូ១គ្រឿងទៀតម៉ាកហុងដាឌ្រីម ស៊េរីឆ្នាំ២០១៧ ពណ៌ខ្មៅ ពាក់ស្លាកលេខភ្នំពេញ 1GI-1646 ជិះឌុបគ្នា៣នាក់ (ប្រុស១ ស្រី២ ) ដេញតាមពីក្រោយមិនប្រយ័ត្នក៏ជ្រុលទៅបុកឡំប្រឺតាដែលកំពុងធ្វេីដំណេីរស្របផ្លូវនិងដឹកភ្ញៀវចំពីមុខពេញទំហឹង បណ្ដាលឲ្យភាគីខាងម៉ូតូហុងដាឌ្រីមជិះឌុបគ្នា៣នាក់ខាងលេីរងរបួសធ្ងន់២នាក់ ស្រាលម្នាក់ ។ បន្ទាប់មកប្រជាពលរដ្ឋក៏សួរទៅកាន់ជនរងគ្រោះដែលរងរបួសស្រាលបានប្រាប់ថា ពួកគេត្រូវចោរឆក់ខ្សែកបានសម្រេច ទេីបនាំគ្នាដេញតាមចាប់ក៏ជ្រុលទៅបុកឡំប្រឺតាយ៉ាងដូច្នេះ។ ចំណែកជនសង្ស័យម្នាក់ដែលឆក់ខ្សែកជនរងគ្រោះបានសម្រេចនោះ ក៏បានជិះម៉ូតូគេចខ្លួនដោយសុវត្ថិភាព ។
ក្រោយកេីតហេតុ ជនរងគ្រោះប្រុសស្រីទាំង៣នាក់ខាងលេី ត្រូវបានរថយន្តសាមុយដឹកយកទៅសង្គ្រោះនៅឯមន្ទីរពេទ្យឯកជនភ្លាមៗ ។ ចំណែកឡំប្រឺតានិងម៉ូតូជនរងគ្រោះដែលរងការខូចខាតខាងលេី ត្រូវបានសមត្ថកិច្ចមូលដ្ឋាននិងជំនាញធ្វេីការវាស់វែងយកទៅរក្សាទុករង់ចាំដោះស្រាយគ្នាតាមក្រោយ ៕
ដោយ ៖ ភារ៉ា ដង្កោ
