សារព័ត៌មាន នគរវត្ត តែងតែនាំមុខគេជានិច្ច
កូនប្រុសរបស់អតីតខ្សែប្រយុទ្ធ Wayne Rooney កំពុងដើរតាមគន្លងឪពុករបស់គេដោយបានចុះហត្ថលេខាជាមួយក្រុមក្លិប Manchester United ដែលឪពុកធ្លាប់លេងនៅក្លិបមួយនេះជាច្រើនឆ្នាំ។ នេះបើយោងតាមការចុះផ្សាយរបស់ BBC Sport កាលពីថ្ងៃទី១៨ធ្នូ។
កុមារា Kai អាយុ១១ឆ្នាំត្រូវបានគេថតរូបរួមជាមួយឪពុកនិងម្តាយរបស់គេឈ្មោះ Colleen ដាក់ប៊ិចក្រដាសនៅលើកិច្ចសន្យានៅឯកីឡដ្ឋាន Old Trafford។
អតីតខ្សែប្រយុទ្ធ Wayne Rooney ដែលបានលេងឱ្យក្រុមបិសាចក្រហមពីឆ្នាំ២០០៤ ដល់ឆ្នាំ២០១៧ បានសរសេរនៅលើបណ្តាញសង្គម Instagram ថា “ថ្ងៃនេះមានមោទនភាព ដោយ Kai បានចុះកុងត្រាជាមួយ Man Utd ។ សូមឲ្យកូនប្រុសខិតខំហ្វឹកហាត់និងលេងឲ្យបានល្អ”។
កុមារា Kai ក៏ត្រូវបានគេមើលឃើញថា បានពាក់អាវក្លិប Manchester United លេខ១០នៅខាងក្រោយខ្នងដែរដែលជាលេខដូចគ្នាដែលឪពុករបស់គាត់ពាក់កាលពីលេងនៅទីនោះ។
គួររំលឹកថា អតីតខ្សែប្រយុទ្ធអន្តរជាតិអង់គ្លេស Wayne Rooney គឺជាអ្នកស៊ុតបាល់បញ្ចូលទីនាំមុខគេ ឲ្យក្លិបបិសាចក្រហម Manchester United ដោយរកបាន២៥៣គ្រាប់ពីការបង្ហាញខ្លួន៥៥៩លើក មិនទាន់មានកីឡាកររូបណាបំបែកកំណត់ត្រានេះនៅឡើយទេរហូតដល់បច្ចុប្បន្ន ៕ដោយ៖ភារៈ
