សារព័ត៌មាន នគរវត្ត តែងតែនាំមុខគេជានិច្ច
នៅថ្ងៃទី២ ខែមករា ឆ្នាំ២០២១ រដ្ឋមន្ត្រីក្រសួងសុខាភិបាលឥណ្ឌាលោក Harsh Vardhan បានឲ្យដឹងថា ប្រទេសនេះនឹងបង្កើនការចាក់វ៉ាក់សាំងដល់ពលរដ្ឋដោយអត់គិតថ្លៃនៅទូទាំងប្រទេសមិនមែនតែនៅក្នុងទីក្រុងញូវដេលីនោះឡើយ។
លោកHarsh Vardhan បានបញ្ជាក់ថា វ៉ាក់សាំងប្រឆាំងកូវីដ-១៩ បានបញ្ជូនទៅដល់មន្ទីរពេទ្យក្នុងទីក្រុងនានាដើម្បីត្រៀមចាក់ជូនពលរដ្ឋ។ នៅថ្ងៃទី២ខែមករានេះឥណ្ឌាចាប់ផ្តើមចាក់វ៉ាក់សាំងប្រឆាំងកូវីដ-១៩ដល់ពលរដ្ឋរបស់ខ្លួន។ រដ្ឋមន្ត្រីក្រសួងសុខាភិបាលបានអំពាវនាវដល់ពលរដ្ឋ ត្រូវតែមានទំនុកចិត្តលើវ៉ាក់សាំង មិនត្រូវជឿតាមពាក្យចចាមអារ៉ាម ពីកម្រិតសុវត្ថិភាពនោះឡើយ។
រដ្ឋាភិបាលឥណ្ឌាមានបំណងចាក់វ៉ាក់សាំងកូវីដ-១៩ជូនពលរដ្ឋចាប់ពីដើមខែមករាឆ្នាំ២០២១តទៅ។ រដ្ឋាភិបាលមានគម្រោងចាក់វ៉ាក់សាំងជូនពលរដ្ឋឲ្យបាន៣០០លាននាក់ក្នុងរយៈពេលពី៦-៨ខែខាងមុខ។
គិតមកដល់វេលាម៉ោង ៧ និង៣០នាទីថ្ងៃទី២ខែមករាឆ្នាំ២០២១ តាមគេហទំព័រ Worldometer នៅទូទាំងប្រទេសឥណ្ឌាមានចំនួនអ្នកឆ្លងដល់ទៅ 10.305.788 នាក់ ឈរលំដាប់ទីពីរបន្ទាប់ពីអាមេរិក និងមានអ្នកស្លាប់ដល់ទៅ១៤៩.២១៨នាក់។
ឥណ្ឌាជាប្រទេសដែលរឹតត្បិតខ្លាំងបំផុតក្នុងការទប់ស្កាត់ឆ្លងរាលដាលកូវីដ-១៩ ។ កម្លាំងសន្តិសុខឥណ្ឌា បានប្រើប្រាស់ រំពាត់វាយទៅលើអ្នកដែលបំពានច្បាប់បម្រាមគោចរ។ កម្លាំងសន្តិសុខយាមល្បាតបានពាក់មួកមានរូបកូវីដ-១៩ ដើម្បីឲ្យពលរដ្ឋមានការប្រុងប្រយ័ត្ន៕ដោយ៖ធី រីណា
