សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ ខណៈក្រុមហ៊ុនប្រេងដូង Sime Darby របស់ប្រទេសម៉ាឡេស៊ី បានប្រើកម្លាំងពលកម្មដោយបង្ខំលេីកម្មករ ដើម្បីផលិតប្រេងដូង ធ្វេីឲ្យសហរដ្ឋអាមេរិកដាក់បម្រាមលើការនាំចូលដូងប្រេងរបស់ប្រទសនេះ។
ជាក់ស្តែងសហរដ្ឋអាមេរិក ដោយលើកឡើងពីការចោទប្រកាន់ប្រើប្រាស់កម្លាំងពលកម្មដោយបង្ខំ ក៏បានប្រកាសថា ខ្លួនបានហាមឃាត់ការនាំចូលប្រេងដូងពីក្រុមហ៊ុនម៉ាឡេស៊ី ឈ្មោះ Sime Darby Plantation Berhad។
បេីតាមទីភ្នាក់ងារគយនិងការពារព្រំដែន (CBP) របស់សហរដ្ឋអាមេរិក កាលពីថ្ងៃទី៣០ ខែធ្នូ បានចេញសេចក្តីថ្លែងការណ៍មួយ ដោយនិយាយថា ខ្លួនបានចេញបទបញ្ជាដកហូតទុកដែលអនុញ្ញាតឱ្យទីភ្នាក់ងារនេះ រារាំងការដឹកជញ្ជូននៅក្នុងសហរដ្ឋអាមេរិកនៃផលិតផលប្រេងដូងរបស់ក្រុមហ៊ុនសៀម ដាប៊ី (Sime Darby) ដែលផលិតដោយកម្លាំងពលកម្មដោយបង្ខំ។
ដោយឡែកស្នងការស្តីទីនៃភ្នាក់ងារគយនិងព្រំដែន លោក Mark A. Morgan បានមានប្រសាសន៍ក្នុងសេចក្តីថ្លែងការណ៍ថា «ការចេញសេចក្តីបង្គាប់ឱ្យឃាត់ទុកនេះបង្ហាញពីសារៈសំខាន់ចាំបាច់ សម្រាប់ជនជាតិអាមេរិកដើម្បីស្រាវជ្រាវប្រភពដើមនៃផលិតផលប្រចាំថ្ងៃដែលពួកគេទិញ»។
អតិថិជនអាមេរិកអាចជួយបញ្ចប់ទាសភាពសម័យទំនើប ដោយជ្រើសរើសទិញផលិតផលដែលពួកគេដឹងថា មានលក្ខណៈក្រមសីលធម៌និងប្រើធនធានមនុស្សដោយមនុស្សធម៌។
សូមជម្រាបថា ប្រេងដូងត្រូវបានប្រើនៅក្នុងផលិតផលជាច្រើនពីអាហាររហូតដល់គ្រឿងសម្អាងនិងរហូតដល់ចំហេះ។ ប្រទេសឥណ្ឌូនេស៊ីនិងម៉ាឡេស៊ី ជាអ្នកនាំចេញប្រេងដូងដ៏សំខាន់ដែលជាផលិតកម្មត្រូវបានស្តីបន្ទោសថានាំឲ្យមានការកាប់បំផ្លាញព្រៃឈើ។
អ្នកស្រី Ana Hinojosa នាយិកានៃនាយកដ្ឋានពង្រឹងច្បាប់ពាណិជ្ជកម្មរបស់ទីភ្នាក់ងារគយនិងព្រំដែន បានប្រាប់ CNN ថា៖ «ប្រេងដូងគឺជាគ្រឿងផ្សំនៅក្នុងផលិតផលជាច្រើន ដែលអតិថិជនអាមេ រិក ទិញនិងប្រើប្រាស់ ហើយខ្ញុំគិតថា វាមានសារៈសំខាន់សម្រាប់ក្រុមហ៊ុនផលិតនិងអ្នកនាំចូល ត្រូវដឹងកន្លែងដែលប្រឈមនឹងហានិភ័យខ្ពស់នៃការប្រើកម្លាំងពលកម្មដោយបង្ខំ និងទាមទារឱ្យអ្នកផ្គត់ផ្គង់របស់ពួកគេប្រកាន់ខ្ជាប់ ដើម្បីការពារសិទិ្ធមនុស្សរបស់កម្មកររបស់ពួកគេ»។
បណ្តាញទូរទស្សន៍ខ្សែកាប CNN បានរាយការណ៍ទៀតថា សហរដ្ឋអាមេរិកបាននាំចូលប្រេងដូងឆៅ គិតជាទឹកប្រាក់ប្រមាណ ៤១០ លានដុល្លារ ពីប្រទេសម៉ាឡេស៊ីក្នុងឆ្នាំសារពើពន្ធ ២០២០។
គួរបញ្ជាក់ថា ក្រុមហ៊ុន Sime Darby មិនបានឆ្លើយតបភ្លាមៗចំពោះការប្រកាសការហាមឃាត់នោះទេ។ នេះជាក្រុមហ៊ុនទី ៣ របស់ម៉ាឡេស៊ីនៅឆ្នាំនេះ ដែលត្រូវបានហាមឃាត់ដោយអាជ្ញាធរសហរដ្ឋអាមេរិក ដោយសារមានការចោទប្រកាន់ពីការប្រើប្រាស់កម្លាំងពលកម្មដោយបង្ខំ៕ដោយ៖ស តារា
