ប្រធានាធិបតីត្រាំប្រកាសថានឹងតស៊ូដល់ទីបញ្ចប់ដើម្បីរក្សាកៅអីប្រធានាធិបតី

ចែករំលែក៖

ប្រធានាធិបតីអាមេរិកដូណាល់ ត្រាំ កាលពីយប់ថ្ងៃទី៤ខែមករាឆ្នាំ២០២១(ពេលវេលានៅអាមេរិក) បានប្រកាសថានឹងតស៊ូដល់ទីបញ្ចប់ ដើម្បីរក្សាកៅអីប្រធានាធិបតីអាមេរិក។ លោកត្រាំក៏បានអំពាវនាវដល់ក្រុមអ្នកបង្កើតច្បាប់នៃគណបក្សសាធារណរដ្ឋប្រែក្រឡាស់លទ្ធផលបោះឆ្នោតអាមេរិកឆ្នាំ២០២០។

ប្រធានាធិបតី ដូណាល់ ត្រាំ បានបន្តផ្សព្វផ្សាយឃោសនាស្តីពីការបោះឆ្នោតអាមេរិក ដែលមានការបន្លំសន្លឹកឆ្នោត។ លោកត្រាំបញ្ជាក់ថាលោកបៃឌិននឹងមិនអាចចូលក្នុងសេតវិមានបានឡើយ។
កន្លងមកនៅទីក្រុងវ៉ាស៊ីនតោន ប្រធានាធិបតីដូណាល់ ត្រាំបានអំពាវនាវដល់តំណាងរាស្ត្រគណបក្សសាធារណរដ្ឋប្រែក្រឡាស់លទ្ធផលបោះឆ្នោតអាមេរិកនៅក្នុងសភានាថ្ងៃទី៦ខែមករា ។

ថ្ងៃទី៦ខែមករា គឺជាពេលវេលាសំខាន់បំផុតដែលរដ្ឋសភាបោះឆ្នោតអនុម័តលទ្ធផលបោះឆ្នោត ប្រធានាធិបតីជាលើកចុងក្រោយ។
ការខិតខំប្រែក្រឡាស់លទ្ធផលបោះឆ្នោតប្រធានាធិបតីរបស់លោកត្រាំ កំពុងតែធ្វើឲ្យគណបក្សសាធារណរដ្ឋបែកបាក់គ្នា ។ តំណាងរាស្ត្រគណបក្សសាធារណរដ្ឋមួយចំនួននៅតែបន្តគាំទ្រលោកត្រាំក្នុងការប្រែក្រឡាស់លទ្ធផលបោះឆ្នោត។ ចំណែកមន្ត្រីជាច្រើនរូបទៀតបានប្រកាសថា ការមិនទទួលស្គាល់លទ្ធផលបោះឆ្នោតនឹងធ្វើឲ្យប៉ះពាល់យ៉ាងខ្លាំងដល់ទំនុកចិត្តរបស់ពលរដ្ឋ និងប៉ះពាល់ដល់ប្រជាធិបតេយ្យអាមេរិក ។ ចំណែកអតីតរដ្ឋមន្ត្រីការពារជាតិអាមេរិក ១០ រូបបានព្រមព្រៀងគ្នាថា ពេលវេលានៃការ តវ៉ាលទ្ធផលបោះឆ្នោតបានកន្លងផុតទៅ។
អនុប្រធានាធិបតីអាមេរិក លោក Mike Pence នឹងដឹកនាំកិច្ចប្រជុំសភានៅថ្ងៃទី៦ខែមករា ដោយលោកបានសន្យាថា ទឹកដីអាមេរិក នឹងមានលទ្ធផលផ្លូវការនៅក្នុងកិច្ចប្រជុំសភាលើកនេះ ។
នៅពេលនេះក្រុមអ្នកគាំទ្រលោកត្រាំបាននាំគ្នាមកកាន់ទីក្រុងវ៉ាស៊ីនតោនដើម្បីត្រៀមធ្វើមហាបាតុកម្ម ក្រោយសភាបើកកិច្ចប្រជុំ និងបោះឆ្នោតជ្រើសរើសប្រធានាធិបតី អាមេរិក ៕