សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្លាំងនគរបាលប៉ុស្តិ៍រដ្ឋបាលចោមចៅទី១ ខណ្ឌពោធិ៍សែនជ័យសហការជាមួយកម្លាំងនគរបាលប៉ុស្តិ៍រដ្ឋបាលស្ទឹងមានជ័យទី៣ ខណ្ឌមានជ័យ បានធ្វើការឃាត់ខ្លួនមនុស្សចំនួន៦នាក់សង្ស័យជាប់ពាក់ព័ន្ធនឹងករណីប្លន់ម៉ូតូពលរដ្ឋពេលយប់។
ប្រតិបត្តិការនេះបានធ្វេីឡេីងកាលពីវេលាម៉ោង១២និង៣០នាទីរំលងអធ្រាត្រ ឈានចូលថ្ងៃទី៦ខែមករា ឆ្នាំ២០២១ នៅចំណុចក្នុងក្លិបសេះមាស ស្ថិតនៅតាមបណ្តោយផ្លូវចោមចៅ ក្នុងសង្កាត់ស្ទឹងមានជ័យទី៣ ខណ្ឌមានជ័យ។
តាមសមត្ថកិច្ចបានបង្ហេីបប្រាប់ឲ្យដឹងថា មុនឈានដល់ការឃាត់ខ្លួនជនសង្ស័យទាំង៦នាក់ខាងលេី គឺយើងមានការសង្ស័យថាជនសង្ស័យទាំងនោះជាមុខសញ្ញាប្លន់ម៉ូតូនៅក្នុងមូលដ្ឋានសង្កាត់ចោមចៅទី១ ខណ្ឌពោធិ៍សែនជ័យកាលពីពេលកន្លងមក ហេីយក្រុមជនសង្ស័យទាំងនោះតែងតែមករាំលេងនៅក្នុងក្លិបសេះមាស ក្នុងមូលដ្ឋានសង្កាត់ស្ទឹងមានជ័យទី៣ ខណ្ឌមានជ័យ ទេីបកម្លាំងនគរបាលចោមចៅទី១ មកសហការឃាត់ខ្លួនបាន៦នាក់និងម៉ូតូ៤គ្រឿងតែម្តង។
ទោះជាយ៉ាងណាសមត្ថកិច្ចក៏មិនអះអាងថា ជនសង្ស័យទាំង៦នាក់នោះជាមុខសញ្ញាប្លន់ម៉ូតូពលរដ្ឋពេលយប់នោះទេគឺគ្រាន់តែមានការសង្ស័យប៉ុណ្ណោះ។
បច្ចុប្បន្នជនសង្ស័យទាំង៦នាក់ត្រូវបានសមត្ថកិច្ចប៉ុស្តិ៍រដ្ឋបាលចោមចៅទី១ នាំខ្លួនយកទៅធ្វេីការសាកសួរបន្ត។សូមបញ្ជាក់ផងដែរថា នៅក្នុងមូលដ្ឋានខណ្ឌពោធិ៍សែនជ័យតែងតែកេីតឡេីងនូវបទល្មេីស លួច ឆក់ ប្លន់ជាញឹកញាប់ ធ្វើឱ្យសមត្ថកិច្ចតាមស្វះស្វែងបង្ក្រាបដោយមិនគិតពីការនឿយហត់នោះទេ៕
ដោយ ៖សុខាសែនជ័យ
