សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បេីយោងតាមអ្នកនាំពាក្យគណបក្សប្រជាជនកម្ពុជា លោក សុខឥសាន បានបញ្ជាក់ថា ដោយសារតែការរាតត្បាតនៃជំងឺកូវីដ–១៩ ដូច្នេះក្នុងឆ្នាំ២០២១នេះ គណបក្សប្រជាជនកម្ពុជាមិនបានរៀបចំមិទ្ទីងធំ ដើម្បីអបអរសាទរបុណ្យខួបលើកទី៤២ឆ្នាំ នៃថ្ងៃជ័យជំនះ៧មករា(៧មករា១៩៧៩– ៧ មករា ២០២១)ដូចរាល់ឆ្នាំនោះទេ។
លោក សុខ ឥសាន បានថ្លែងនៅព្រឹកថ្ងៃទី៦ ខែមករា ឆ្នាំ២០២១នេះថា៖«គណបក្សប្រជាជនកម្ពុជា បានធ្វើសេចក្ដីជូនដំណឹងជាសាធារណៈហើយថាដោយសារឥទ្ធិពលនៃការរាតត្បាតនៃជំងឺកូវីដ គណបក្សមិនបានធ្វើមហាមិទ្ទីងធំដូចរាល់ឆ្នាំទេបាទ»។
អ្នកនាំពាក្យរូបនេះ ថ្លែងបន្តថា ដោយឡែកនៅតាមបណ្ដារាជធានី–ខេត្តស្រុក–ខណ្ឌ ក៏មិនមានការរៀបចំកម្មវិធីធំដូចឆ្នាំមុនៗដែរ ដើម្បីចូលរួមបង្ការនិងទប់ស្កាត់នូវការរាតត្បាតនៃជំងឺកូវីដ–១៩។ ជាមួយគ្នានេះលោក សុខឥសាន បានបញ្ជាក់បន្ថែមថា«ក៏ប៉ុន្តែនៅតាមស្នាក់ការនៅទីចាត់ការរបស់គណបក្សនីមួយៗ មានការលើកបដា លើកទង់ឈ្វេលេ ក៏ដូចជាពាក្យស្លោកផ្សេងៗដើម្បីកុំថាថ្ងៃហ្នឹង ជាថ្ងៃរំលឹកនៃជ័យជំនះ៧មករា»។
គួរបញ្ជាក់ដែរថា គណបក្សប្រជាជនកម្ពុជា ជារៀងរាល់ឆ្នាំតែងតែរៀបចំមហាមិទ្ទីងដើម្បីអបអរសាទរនៃទិវាជ័យជំនះ៧មករា នៅទីស្នាក់ការកណ្ដាលគណបក្ស និងនៅទីស្នាក់គណបក្សតាមបណ្ដារាជធានី–ខេត្ត ស្រុក–ខណ្ឌទូទាំងប្រទេស។ ក៏ប៉ុន្តែនៅឆ្នាំ២០២១ ដែលជាខួបលើកទី៤២ឆ្នាំ នៃទិវាជ័យជំនះ៧មករានេះ គឺមិនមានការរៀបចំធំដូចរាល់ឆ្នាំនោះឡើយ ក៏ព្រោះតែជំងឺកូវីដ–១៩ បាននឹងកំពុងបន្តរាតត្បាតនៅលើពិភពលោក ក៏ដូចជាប្រទេសកម្ពុជាផងដែរ។
សូមជម្រាបថា ថ្ងៃទី៧ ខែមករា ឆ្នាំ១៩៧៩ គឺប្រជាពលរដ្ឋខ្មែរទូទាំងប្រទេសបានចាត់ទុកថា ជាអាយុជីវិតទី២របស់ពួកគាត់ដែលបានរស់ឡើងវិញពីរបបប្រល័យពូជសាសន៍ប៉ុលពត។ ៧ មករា ១៩៧៩ បានផ្តល់ជីវិត និងសិទ្ធិសេរីភាពពេញលេញដល់ប្រជាពលរដ្ឋ ក៏ដូចជាឱកាសគ្រប់យ៉ាងក្នុងការកសាងសង្គមគ្រួសារ និងការអភិវឌ្ឍន៍សង្គមជាតិទាំងមូលឲ្យកាន់តែរីកចំរើនមកដល់សព្វថ្ងៃនេះ៕ដោយ៖សហការី
