សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ក្រោយភ្ជាប់ពាក្យបានប្រមាណជិត១ឆ្នាំ ពិធីការិនីប្រចាំទូរទស្សន៍ហង្សមាស អ្នកនាងប៉ែន ស្រីពេជ្រ បានដឹកដៃបុរសកំពូលស្នេហ៍ ចូលរោងការជាផ្លូវការហើយកាលពីថ្ងៃទី៨ ខែមករា ឆ្នាំ២០២១ ។ ពិធីជប់លៀងធំធ្វើនៅភោជនីយដ្ឋានទន្លេបាសាក់២ ក្បាលថ្នល់ដោយមានការចូលរួមច្រើនកុះករដោយសិល្បករសិល្បការិនី ជាច្រើន។
ស្រីពេជ្រគឺជាពិធីការិនីប្រចាំទូរទស្សន៍ហង្សមាសក្នុងកម្មវិធីប្រគំតន្ត្រីមួយចំនួនដែលឧស្សាហ៍ចាប់ដៃគូជាមួយលោក រ៉ាស៊ី លោកជា វិបុល និងលោក វិសាលជាដើម។ នាងនិងគូស្នេហ៍ បានស្គាល់គ្នា និងមើលចិត្តថ្លើមគ្នាអស់រយៈពេល៥ឆ្នាំមកហើយ ហើយទើបបានភ្ជាប់ពាក្យនឹងគ្នានៅថ្ងៃទី២៧ ខែមេសា ឆ្នាំ២០២០កន្លងទៅ។ពិធីការិនីនិងតារាសម្ដែងស្រអែមស្រស់ រូបនេះ រីករាយជាខ្លាំងនៅពេលដែលនាងគ្រងឈុតកូនក្រមុំយ៉ាងស្រស់ស្អាត ហើយមានមិត្តរួមអាជីពជាច្រើនបានទៅអបអរសាទរនៅថ្ងៃពិសេសរបស់នាង។ នេះចាត់ទុកថាជាពិធីមង្គលការទ្រង់ទ្រាយធំរបស់សិល្បករខ្មែរបន្ទាប់ពីលេចចេញជំងឺកូវីដ១៩ចាប់តាំងពីដើមឆ្នាំ២០២០មក ខណៈដែលមានសិល្បករមួយចំនួនបានលុបចោល និងខ្លះបានត្រឹមតែជាការជួបជុំសាច់ញាតិជិតដិតរៀបចំពិធីសែនព្រេន មួយចំនួនបង្គ្រប់កិច្ចប៉ុណ្ណោះព្រោះតែពួកគេមិនចង់រំលងពាលាល្អនិងទទួលយកគ្នាជាប្តីប្រពន្ធមានចាស់ទុំដឹងលឺនិងស្របទៅតាមប្រពៃណីខ្មែរបុរាណផងដែរ។ មានការបញ្ជាក់ដែរថាពិធីមង្គលការពិធីការិនីរូបនេះក៏មានការចូលរួមច្រើនកុះករពីសំណាក់ក្រុមមន្ត្រី និងអ្នកជំនួញមានមុខមាត់ព្រោះតែស្វាមីនាងត្រូវបានគេស្គាល់ជាកូនប្រុសមន្ត្រីរាជការនិងអ្នកជំនួញល្បីឈ្មោះម្នាក់ផងដែរ។ ពិធីការិនីសម្បុរស្រអែមស្រប់រូបនេះធ្លាប់លើកឡើងដែរថាក្រោយរៀបមង្គលការនាងនៅតែបន្តការងារសិល្បៈជាធម្មតា ខណៈដែលកូនកំលោះជាស្វាមីដែលមានឈ្មោះថា ឆេង ពន្លកនេត្រា គឺជាអ្នកធ្វើការផ្នែកទីផ្សារ ៕
ដោយ៖វឌ្ឍនា
