សារព័ត៌មាន នគរវត្ត តែងតែនាំមុខគេជានិច្ច
សាធារណរដ្ឋកូរ៉េ៖ ម៉ាស់ការពារជំងឺឆ្លងចំនួន 5 ម៉ឺនសន្លឹក ត្រូវបានក្រុមហ៊ុន Namyoung Global ប្រគល់មកស្ថានទូតកម្ពុជា ដើម្បីចែកជូនដល់ប្រជាពលរដ្ឋខ្មែរនៅកូរ៉េនេះ។ នេះបើតាមការបញ្ជាក់ឲ្យដឹងពីលោក ឡុង ឌីម៉ង់ ឯកអគ្គរាជទូតកម្ពុជា ប្រចាំសាធារណរដ្ឋកូរ៉េ នៅរសៀលថ្ងៃទី១២ ខែមករា ឆ្នាំ២០២១។
លោកបានបន្តថា, ស្ថានទូតសូមថ្លែងអំណរគុណដល់ក្រុមហ៊ុន ហើយត្រៀមខ្លួនក្នុងការជួយផ្ដល់ព័ត៌មានក៏ដូចជាសម្របសម្រួលដល់ក្រុមហ៊ុន Namyoung Global ដែលមានបំណងនាំចូលគ្រឿងម៉ាសុីនផលិតម៉ាស់, ស្រោមដៃពេទ្យ ក៏ដូចជាបណ្ដាក់ទុនវិនិយោគផលិតម៉ាស់ និងបរិក្ខារពេទ្យនៅកម្ពុជា។
ទន្ទឹមនឹងនេះ ម៉ាស់ទាំង 5 ម៉ឺនសន្លឹកខាងលើ ស្ថានទូតនឹងចាត់ចែងផ្ញើជូនសហគមន៍ខ្មែរយើង តាមរយៈបណ្ដាសមាគមខ្មែរ មជ្ឈមណ្ឌលព្រះពុទ្ធសាសនាខ្មែរ និងលោកគ្រូ-អ្នកគ្រូមួយចំនួន ដែលធ្វើការនៅតាមមជ្ឈមណ្ឌលគាំពារពលករ មជ្ឈមណ្ឌលគាំពារគ្រួសារអន្តោប្រវេសន៍ជាដើមទូទាំងកូរ៉េ៕
ដោយ៖សិលា
