សារព័ត៌មាន នគរវត្ត តែងតែនាំមុខគេជានិច្ច
នៅថ្ងៃទី១៥ ខែមករា ឆ្នាំ២០២១ ពេលវេលានៅអាមេរិក រដ្ឋជាច្រើននៅអាមេរិកបានដាក់កម្លាំងទាហានការពារ ហើយបានប្រកាសអាសន្ន នៅក្នុងរដ្ឋរបស់ខ្លួនដើម្បីទប់ស្កាត់ ការធ្វើបាតុកម្មក្លាយជាហិង្សានៅថ្ងៃប្រធានាធិបតីថ្មីចូលកាន់តំណែង ។
សកម្មភាពខាងលើ គឺដើម្បីទប់ស្កាត់អំពើហិង្សាកើតឡើង ដូចថ្ងៃទី ៦ខែមករា នៅវិមានរដ្ឋសភា បង្កឡើងដោយក្រុមអ្នកគាំទ្រលោកត្រាំ បណ្តាលឲ្យមានមនុស្ស៥នាក់ស្លាប់។
តាមប្រភពព័ត៌មានបានឲ្យដឹងថា ក្រុមបាតុករនឹងចាប់ផ្តើមធ្វើបាតុកម្មពីថ្ងៃទី១៧ ខែមករា ឆ្នាំ២០២១ រហូតដល់ថ្ងៃលោកបៃឌិន ស្បថចូលកាន់តំណែង ។ ជាមួយគ្នានោះដែរតំបន់ជាច្រើនក្នុងទីក្រុងវ៉ាស៊ីនតោនត្រូវបានបិទ ហើយកម្លាំងទាហានជាង២៥ពាន់នាក់ បានដាក់ពង្រាយការពារវិមានរដ្ឋសភា ជាទីកន្លែងដែលលោកបៃឌិនស្បថចូលកាន់តំណែង។
តាមអគ្គនាយក FBI លោក Christoper Wray បានឲ្យដឹងថា បានកំណត់អត្តសញ្ញាណជនដៃដល់២០០នាក់ដែលបង្កអំពើហិង្សានៅវិមានរដ្ឋសភា ។ ក្រៅពីទីក្រុងវ៉ាស៊ីនតោន នៅរដ្ឋចំនួន១០ ផ្សេងទៀត ក៏បានបញ្ជូនកម្លាំងទាហានទៅការពារទីតាំងសាធារណៈទប់ស្កាត់ហេតុការណ៍អាក្រក់កើតឡើង។
នៅព្រឹត្តិការណ៍មួយផ្សេងទៀត ប្រធានាធិបតីជិតបញ្ចប់តំណែងលោកត្រាំបានប្រកាសថា នៅថ្ងៃដែលលោកចាកចេញពីសេតវិមាន និងមានពិធីបាញ់កាំភ្លើងធំចំនួន២១ណាត់ ជាការជូនដំណើរលោក។
សារព័ត៌មាន AP បានផ្សាយថា ពិធីបញ្ចប់តំណែងនឹងត្រូវរៀបចំនៅទីតាំងយោធា Andrewsរដ្ឋ Maryland ដោយមានពិធីជប់លៀង ដូចជាការស្វាគមន៍ប្រមុខដឹកនាំមកពីក្រៅប្រទេស ។ ចំណុចពិសេសនោះគឺមានបាញ់កាំភ្លើងធំ២១ណាត់ផងដែរ៕
ដោយ៖ធី រីណា
