សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បើយោងតាម នាយកដ្ឋានព័ត៌មានវិទ្យា នៃក្រសួងមហាផ្ទៃ បានបញ្ជាក់ឲ្យដឹងថា, នារសៀលថ្ងៃព្រហស្បតិ៍ទី២១ ខែមករា ឆ្នាំ២០២១ នៅទីស្តីការក្រសួងមហាផ្ទៃ ក្រុមការងារតាមដានអំពីការដោះស្រាយចំពោះមតិ យោបល់ ឬសំណូមពររបស់មហាជនក្នុងគេហទំព័រហ្វេសប៊ុកផ្លូវការរបស់សម្តេចក្រឡាហោម ស ខេង បានបើកកិច្ចប្រជុំបូកសរុបលទ្ធផលការងារប្រចាំឆ្នាំ២០២០ និងលើកទិសដៅការងារបន្តឆ្នាំ២០២១ ព្រមទាំងប្រកាសសេចក្តីសម្រេច ស្តីពីការកែសម្រួលសមាសភាព និងភារកិច្ចរបស់ក្រុមការងារតាមដានអំពីការដោះស្រាយចំពោះមតិ យោបល់ ឬសំណូមពររបស់មហាជនក្នុងគេហទំព័រហ្វេសប៊ុក (Facebook Page) របស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក្រោមអធិបតីភាពនាយឧត្តមសេនីយ៍ ជា សុគន្ធា អគ្គលេខាធិការរង និងជាប្រធានក្រុមការងារ ដោយមានការអញ្ជើញចូលរួមពី អនុប្រធាន និងសមាជិកនៃក្រុមការងារមកពីតំណាងអង្គភាពពាក់ព័ន្ធ ព្រមទាំងមន្ត្រីពាក់ព័ន្ធជាច្រើនរូបផងដែរ។
នាយឧត្តមសេនីយ៍ អគ្គលេខាធិការរង និងជាប្រធានក្រុមការងារ មានប្រសាសន៍ថា កិច្ចប្រជុំនាពេលនេះ គឺដើម្បីបូកសរុបលទ្ធផលការងារដែលក្រុមការងារសម្រេចបានក្នុងឆ្នាំ២០២០កន្លងទៅ និងលើកទិសដៅសម្រាប់ការងារអនុវត្តបន្តក្នុងឆ្នាំ២០២១ ហើយក៏ដើម្បីប្រកាសសេចក្តីសម្រេចការកែសម្រួលសមាសភាព និងភារកិច្ចថ្មីរបស់ក្រុមការងារតាមដានអំពីការដោះស្រាយចំពោះមតិ យោបល់ ឬសំណូមពររបស់មហាជនក្នុងគេហទំព័រហ្វេសប៊ុករបស់សម្តេចក្រឡាហោម ស ខេង។ ក្នុងនោះ នាយឧត្តមសេនីយ៍ បានលើកឡើងថា ដោយមានការចាំបាច់ច្រើនលើការងារទទួលដោះស្រាយបញ្ហារបស់ប្រជាពលរដ្ឋ ទើបសមាសភាពក្រុមការងារចាសត្រូវបានកែសម្រួលបន្ថែមសមាសភាពថ្មីឡើងវិញ ដើម្បីឆ្លើយតបទៅនឹងតម្រូវការនៃទំហំការងារបច្ចុប្បន្ន ដែលមានសមាសភាពថ្មីចំនួន ២៥រូប ក្នុងនោះប្រធានចំនួន ១រូប អនុប្រធានចំនួន ៥រូប និងសមាជិកចំនួន ១៦រូប។
លើសពីនេះទៀត នាយឧត្តមសេនីយ៍ បានគូសបញ្ជាក់បន្តថា ក្រុមការងារតាមដានអំពីការដោះស្រាយចំពោះមតិ យោបល់ ឬសំណូមពររបស់មហាជនក្នុងគេហទំព័រហ្វេសប៊ុករបស់សម្តេចក្រឡាហោម ស ខេង គឺមានតួនាទីធ្វើជាសេនាធិការរបស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក្នុងការទទួលរាល់បញ្ហាប្រឈម និងសំណូមពររបស់ប្រជាពលរដ្ឋ ដែលបានបញ្ចេញមតិយោបល់ ឬសំណូមពរមកកាន់គេហទំព័រហ្វេសប៊ុករបស់សម្តេចក្រឡាហោម ដើម្បីប្រមូលយកនូវមតិយោបល់នានាមកធ្វើការសម្របសម្រួលរៀបចំជាបណ្តុំ និងបញ្ជូនទៅអង្គភាពជំនាញពាក់ព័ន្ធជាសមត្ថកិច្ចដើម្បីធ្វើការដោះស្រាយ។
នាយឧត្តមសេនីយ៍ បានបន្ថែមថា សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបង្កើតក្រុមការងារនេះឡើងគឺដើម្បីស្វែងយល់ឲ្យដឹងពីសុខទុក្ខរបស់ប្រជាពលរដ្ឋក្នុងជីវភាពរស់នៅប្រចាំថ្ងៃ ក៏ដូចជាបញ្ហាប្រឈមនានារបស់ប្រជាពលរដ្ឋដែលកំពុងជួបផលលំបាក និងភាពមិនពេញចិត្តចំពោះមន្ត្រីថ្នាក់ក្រោមជាតិនៅមូលដ្ឋានអសកម្មក្នុងការងារដោះស្រាយបញ្ហារបស់ប្រជាពលរដ្ឋ។ លោកបានបញ្ជាក់ថា ថ្នាក់ដឹកនាំបានយកចិត្តទុកដាក់ប្រមូលយកគ្រប់បញ្ហាយកមកដោះស្រាយ ក្នុងគោលបំណងដើម្បីឆ្លើយតបឲ្យបានទាន់ពេលវេលាចំពោះបញ្ហារបស់ប្រជាពលរដ្ឋ និងដើម្បីផ្សារភ្ជាប់រវាងប្រជាពលរដ្ឋ ជាមួយអាជ្ញាធរគ្រប់ជាន់ថ្នាក់ក្នុងការចូលរួមបម្រើដល់ប្រជាពលរដ្ឋឲ្យបានគ្រប់ជ្រុងជ្រោយ ដើម្បីឲ្យការរស់នៅរបស់ប្រជាពលរដ្ឋនៅក្នុងសង្គមប្រកបដោយភាពសុខដុមរមនា។
សូមជម្រាបថា ក្រុមការងារតាមដានអំពីការដោះស្រាយចំពោះមតិ យោបល់ ឬសំណូមពររបស់មហាជនក្នុងគេហទំព័រហ្វេសប៊ុក (Facebook Page) របស់សម្តេចក្រឡាហោម ស ខេង ក្នុងរយៈពេល៦ខែកន្លងមក គឺចាប់ពីខែកក្តដា ដល់ខែធ្នូ ឆ្នាំ២០២០ បានស្រង់យកមតិយោបល់ពីគណនីហ្វេសប៊ុកនានា ដែលបានរាយការណ៍ចូលមកផេកហ្វេសប៊ុករបស់សម្តេចក្រឡាហោម ស ខេង បានចំនួន ៥៥១ករណី ក្នុងនោះអង្គភាពជំនាញបានបានដោះស្រាយរួចបានចំនួន ២៤១ករណី និងនៅកំពុងដោយដោះស្រាយមានចំនួន ២៣៨ករណី។
នាយឧត្តមសេនីយ៍ បានបន្ថែមថា ចំពោះករណីសណុំរឿងដែលមិនទាន់បានដោះស្រាយ គឺក្រុមការងារបានបញ្ចូលទៅតាមអង្គភាពព័ន្ធជាសមត្ថកិច្ចក្នុងនាមអ្នកដោះស្រាយរួចអស់ហើយ ប៉ុន្តែក្រុមការងារកំពុងរងចាំលទ្ធផលដែលអង្គភាពជំនាញទទួលដោះស្រាយប្រគល់ជូនត្រលប់មកវិញ។
ជាចុងបញ្ចប់ នាយឧត្តមសេនីយ៍ អគ្គលេខាធិការរង និងជាប្រធានក្រុមការងារ បានថ្លែងការកោតសសើរ និងវាយតម្លៃខ្ពស់ចំពោះការខិតខំប្រឹងប្រែងរបស់ក្រុមការងារ ដែលបានបំពេញតួនាទីភារកិច្ចសម្រេចបានលទ្ធផលបានយ៉ាងល្អប្រសើរគួរឲ្យកត់សម្គាល់ ក្នុងនេះ នាយឧត្តមសេនីយ៍ ក៏បានជម្រុញដល់ក្រុមការងារឲ្យខិតខំធ្វើយ៉ាងណាពង្រឹងការងារ និងប្រមូលយកមតិយោលប់នានាដែលប្រជាពលរដ្ឋបានស្នើ ឬរាយការណ៍ពីបញ្ហាប្រឈមនានាចូលមកគេហទំព័ររបស់សម្តេចក្រឡាហោម ជាបន្តឲ្យបានខ្លាំងខ្លាបន្ថែមទៀតដើម្បីដោះស្រាយជូនប្រជាពលរដ្ឋដែលកំពុងជួបបញ្ហានៅតាមមូលដ្ឋាន ហើយឯកឧត្តម នាយឧត្តមសេនីយ៍ សង្ឃឹមថាក្រុមការងារដែលមកពីតាមអង្គភាពនីមួយបាន ដែលបានទទួលភារកិច្ចតាមមុខសញ្ញារួចរាល់ហើយ និងប្រឹងប្រែងធ្វើការប្រកបដោយស្មារតីទទួលខុសត្រូវខ្ពស់ថែមទៀត៕
ដោយ៖ សិលា
