សារព័ត៌មាន នគរវត្ត តែងតែនាំមុខគេជានិច្ច
យោងតាមការចេញផ្សាយរបស់សារព័ត៌មាន កាលពីថ្ងៃទី២២ មករា ២០២១បានឲ្យថាខ្សែប្រយុទ្ធ Sergio Aguero របស់ក្រុម Manchester City បានធ្វើតេស្តវិជ្ជមានជំងឺCovid-19 ដែលធ្វើឲ្យកីឡាកររូបនេះអាចខកខានការប្រកួតរបស់ក្រុមមួយរយៈពេល។ កីឡាករសញ្ជាតិអាហ្សង់ទីនដែលទើបតែលេងបានសរុប១៤១ឆ្លងកាត់ការបង្ហាញខ្លួនចំនួន៥ដងក្នុងរដូវកាលនេះត្រូវបានដាក់ឲ្យនៅដាច់ដោយឡែកពីគេបន្ទាប់ពីបានធ្វើតេស្តវិជ្ជមានCovid-19។Aguero ខកខានការប្រកួត៣លើកកន្លងមកដោយសាររូបគេត្រូវនៅដាច់ដោយឡែកពីគេហើយពេលនេះគេត្រូវអវត្តមានយូរបន្តិចហើយ។ ខ្សែប្រយុទ្ធវ័យ៣២ឆ្នាំរូបនេះបានសរសេរលើ Twitter ថា “ខ្ញុំមានរោគសញ្ញាខ្លះហើយខ្ញុំកំពុងធ្វើតាមបញ្ជារបស់វេជ្ជបណ្ឌិតដើម្បីឲ្យបានជាសះស្បើយ” ។
នេះគឺជាការខកខានមួយទៀត បន្ទាប់ពីកីឡាករស៊ុតបញ្ចូលទីច្រើនជាងគេរបស់ Man City រូបនេះមានបញ្ហាជង្គង់និងសរសៃពួរដោយត្រូវសម្រាកព្យាបាលមួយរយៈពេលដែរ។ Aguero ដែលបាននៅជាមួយក្លិប Man City តាំងពីឆ្នាំ២០១១ ទើបតែលេងបាន៣១នាទីប៉ុណ្ណោះចាប់តាំងពីត្រូវបានប្តូរចេញនៅតង់ទី១ ពេលប៉ះជាមួយក្រុម West Ham នៅថ្ងៃទី២៤ ខែតុលាកន្លងទៅ។
កាលពីថ្ងៃអង្គារលោក Pep Guardiola គ្រូបង្វឹករបស់ក្រុម Man City បាននិយាយថាក្រុមរបស់លោកបានដោះស្រាយដោយគ្មានខ្សែប្រយុទ្ធឆ្នើមម្នាក់ ប៉ុន្តែក្លិបត្រូវការគាត់ត្រឡប់មកវិញឲ្យបានឆាប់
គ្រូបង្វឹកសញ្ជាតិអេស្ប៉ាញរូបនេះបាននិយាយថា “Sergio គឺជាកីឡាករម្នាក់ដែលអាចបង្កើតសម្រាប់ខ្លួនគាត់និងឈ្នះការប្រកួតដោយខ្លួនឯងប៉ុន្តែគាត់មិនបាននៅជាមួយយើងអស់រយៈពេលជាយូរមកហើយ។ យើងចង់ឱ្យគាត់ត្រឡប់មកវិញឆាប់ៗប៉ុន្តែនៅពេលដំណាលគ្នាយើងត្រូវឆ្ពោះទៅមុខហើយយើងបានធ្វើដូច្នេះដោយសារតែគុណភាព និងជំនាញរបស់កីឡាករដែលយើងមាន” ៕
ដោយ៖ភារៈ
