សារព័ត៌មាន នគរវត្ត តែងតែនាំមុខគេជានិច្ច
មន្ត្រីការទូតកូរ៉េខាងជើងមួយរូបបានភៀសខ្លួនទៅរស់នៅកូរ៉េខាងត្បូង ខណៈកំពុងតែកាន់តំណែងជា ឯកអគ្គរដ្ឋទូតប្រចាំនៅប្រទេសគុយវ៉ែត។
សារព័ត៌មានយ៉ុងហាប់របស់កូរ៉េខាងត្បូងបានផ្សាយនៅថ្ងៃទី ២៥ខែមករាថា មន្ត្រីដែលភៀសខ្លួនទៅរស់នៅកូរ៉េខាងត្បូង ឈ្មោះ Ryu Hyun-woo និងគ្រួសារបានទៅដល់កូរ៉េខាងត្បូងហើយ ។ ព័ត៌មានលម្អិតស្តីពីពេលវេលា ទៅដល់កូរ៉េខាងត្បូង ក៏ដូចជាមូលហេតុមិនត្រូវបានលាតត្រដាងនោះទេ។
តាមប្រភពព័ត៌មាន លោក Ryu Hyun-woo អាចភៀសខ្លួនទៅកាន់កូរ៉េខាងត្បូងតាំងពីខែកញ្ញាឆ្នាំ ២០១៩មកម៉្លេះ គឺក្រោយពេល២ខែ ដែលលោកJo Song-gil ឯកអគ្គរដ្ឋទូតកូរ៉េខាងជើងប្រចាំនៅប្រទេសអុីតាលី បានភៀសខ្លួនទៅរស់នៅកូរ៉េខាងត្បូង។ លោកJo Song-gil បានបាត់ខ្លួនកាលពីឆ្នាំ២០១៨ក្រោយមកត្រូវបានគេឃើញរស់នៅកូរ៉េខាងត្បូង។
ប្រភពព័ត៌មានបានឲ្យដឹងថា លោក Ryu Hyun-woo គឺជាកូនប្រសារបស់លោកJon Il-chun ធ្លាប់កាន់តំណែងជាប្រធានការិយាល័យ៣៩ ដែលគេហៅថា(ទូដែកឯកជន)របស់មេដឹកនាំកូរ៉េខាងជើង ។ ការិយាល័យ៣៩គ្រប់គ្រង មូលនិធិសម្ងាត់ ប្រមូលទិញវត្ថុមានតម្លៃ ។
មូលហេតុដែលលោក Ryu Hyun-woo ភៀសខ្លួនទៅរស់នៅកូរ៉េខាងត្បូង គឺដើម្បីស្វែងរកអនាគតល្អប្រសើរសម្រាប់កូនៗ។ មន្ត្រីចារកិច្ចកូរ៉េខាងត្បូងបដិសេធលើកឡើងពីការភៀសខ្លួនខាងលើ៕ ដោយ៖ធី រីណា
រូបភាព៖Yonhap
