សារព័ត៌មាន នគរវត្ត តែងតែនាំមុខគេជានិច្ច
លោកស្រី Janet Yellen អតីតប្រធានមូលនិធិ Fed ត្រូវបានព្រឹទ្ធសភាអាមេរិកបោះឆ្នោតអនុម័តឲ្យកាន់តំណែងរដ្ឋមន្ត្រីក្រសួងហិរញ្ញវត្ថុ ក្លាយជាស្ត្រីដំបូងគេបង្អស់ដែលកាន់តំណែងដ៏សំខាន់មួយនេះ។ នៅថ្ងៃទី២៥ខែមករា លោកស្រីទទួលបានការគាំទ្រខ្ពស់ក្នុងការបោះឆ្នោតអនុម័តនៅព្រឹទ្ធសភាក្លាយជាស្ត្រីទីមួយកាន់តំណែងក្រសួងហិរញ្ញវត្ថុអាមេរិក។ សារព័ត៌មាន CNBC បានផ្សាយថា លោកស្រីJanet Yellen ដើរតួនាទីយ៉ាងសំខាន់ក្នុងរដ្ឋាភិបាលរបស់ប្រធានាធិបតី ចូ បៃឌិន ។ តំណែងរដ្ឋមន្ត្រីក្រសួងហិរញ្ញវត្ថុគឺដើរតួនាទីយ៉ាងសំខាន់ក្នុងការអភិវឌ្ឍសេដ្ឋកិច្ចជាតិបន្ទាប់ពីកូវីដ-១៩ ។ នៅក្នុងការបោះឆ្នោតនៅព្រឹទ្ធសភា លោកស្រីJanet Yellen ទទួលបានការគាំត្រដល់ទៅ៨៤សំឡេងនិងប្រឆាំងតែ១៥ ប៉ុណ្ណោះ។ លោកស្រីមានបទពិសោធន៍នៅក្នុងការដឹកនាំ Fed យ៉ាងជោគជ័យរយៈពេល៤ឆ្នាំ ក្នុងរដ្ឋការរបស់អតីតប្រធានាធិបតី អូបាម៉ា។ កាលពីសប្តាហ៍កន្លងមក លោកស្រី Janet Yellen បានឆ្លងផុតការសួរនាំពីគណៈកម្មការហិរញ្ញវត្ថុនៅព្រឹទ្ធសភា ហើយទទួលបានការអនុម័តយល់ព្រមឲ្យលោកស្រីកាន់តំណែងក្រសួងហិរញ្ញវត្ថុដោយមានសំឡេងគាំទ្រ១០០% ។ ក្នុងតំណែងថ្មី លោកស្រីJanet Yellen នឹងដើរតួនាទីយ៉ាងសំខាន់ ក្នុងការជំរុញគម្រោងចំណាយប្រាក់ ១៩០០លានដុល្លារ ដែលលោកបៃឌិនបានស្នើឡើងដើម្បីដំណើរការអភីវឌ្ឍសេដ្ឋកិច្ចជាតិ។ ការកាន់តំណែងហិរញ្ញវត្ថុរបស់លោកស្រីJanet Yellen ទទួលបានការចាប់អារម្មណ៍យ៉ាងខ្លាំងពីក្រុមអ្នកវិនិយោគ៕ ដោយ៖ធីរីណា
(រូបភាព៖Bloomberg)
