សារព័ត៌មាន នគរវត្ត តែងតែនាំមុខគេជានិច្ច
ខេត្តប៉ៃលិន៖ លោក ប៊ិន សក្តា ចៅក្រមស៊ើបសួរនៃសាលាដំបូងខេត្តប៉ៃលិនបានសម្រេចឃុំខ្លួនជនសង្ស័យម្នាក់ ដាក់ឱ្យស្ថិតនៅក្រោមការពិនិត្យពីបទញុះញុងឱ្យប្រព្រឹត្តិឧក្រិដ្ឋជាអាទិ៍ កាលពីថ្ងៃទី១១ រហូតដល់ថ្ងៃទី១៨ខែមករា ឆ្នាំ២០២១ ដែលប្រព្រឹត្តិនៅភូមិអូរច្រាកណ្តាលសង្កាត់ទួលល្វាក្រុងប៉ៃលិន ខេត្តប៉ៃលិន ជាបទល្មើសព្រហ្មទណ្ឌ ដែលមានចែង និងឱ្យផ្តន្ទាទោសតាមបញ្ញាត្តិមាត្រា លេខ ៤៩៤ និង ៤៩៥នៃក្រមព្រហ្មទណ្ឌ នៃព្រះរាជាណាចក្រកម្ពុជា ។
តាមប្រភពព័ត៌មានពីកម្លាំងជំនាញការិយាល័យសន្តិសុខផ្ទៃក្នុង នៃផែនការងារសន្តិសុខ ស្នងការដ្ឋាននគរបាលខេត្តប៉ៃលិន បានឲ្យដឹងថា កម្លាំងជំនាញបាននាំខ្លួនជនសង្ស័យម្នាក់មានឈ្មោះ គង់ រិទ្ធ ហៅចូច ភេទប្រុសអាយុ៤១ឆ្នាំ ជាកម្មករ មានស្រុកកំណើតនៅភូមិស្វាយតាហែន ឃុំរកាគយស្រុកកងមាស ខេត្តកំពង់ចាម បច្ចុប្បន្នស្នាក់នៅបណ្តោះអាសន្ន ក្នុងខេត្តឈុនបុរី ប្រទេសថៃ មានប្រពន្ធឈ្មោះ ម៉ី ជូ មានកូនចំនួន២នាក់ បញ្ជូនទៅសាលាដំបូងខេត្ត ដើម្បីអនុវត្តនីតិវិធីច្បាប់កាលពីវេលាម៉ោង១រសៀលថ្ងៃទី២៥ ខែមករា ឆ្នាំ២០២១ ។
ប្រភពដដែលបន្តថា យោងតាមដីការបស់លោក ប៊ិន សក្តា ចៅក្រមស៊ើបសួរនៃសាលាដំបូងខេត្តប៉ៃលិន បានឱ្យដឹងថា ៖ តាមដីកាលេខ៣៩ ត.ព្រ/២១ចុះថ្ងៃទី២៥ ខែមករា ឆ្នាំ២០២១ ខាងលោកបានសម្រេចបញ្ជា ឱ្យភ្នាក់ងារមានសមត្ថកិច្ច នៃកម្លាំងសាធារណ: ធ្វើការនាំខ្លួនជនត្រូវចោទ ឈ្មោះ គង់ រិទ្ធ (មានសាវតាជាតិដូចខាងលើ) ទៅពន្ធនាគារខេត្តប៉ៃលិន ដោយអនុវត្ត ឱ្យបានត្រឹមត្រូវតាមនីតិវិធីនៃច្បាប់ ។
ប្រភពបន្តទៀតថា តាមការបង្គាប់ឱ្យលោកប្រធានពន្ធនាគារខេត្តប៉ៃលិនទទួល និងឃុំខ្លួន ជននេះ រយ:ពេលអតិបរិមា មិនលើសពី៤ខែដោយគិតចាប់ពីថ្ងៃទី២៥ ខែមករា ឆ្នាំ២០២១ តទៅ បង្គាប់ឱ្យគ្រប់ភ្នាក់ងារ នៃកម្លាំងសាធារណ:ទាំងអស់ នៅពេលត្រូវបានបង្ហាញដីកានេះសហការអនុវត្តឱ្យបានល្អនៅក្នុងករណីចាំបាច់៕
ដោយ៖សហការី
