ប្រធានាធិបតី បៃឌិន ជំរុញការដាក់រូបភាពស្ត្រីស្បែកខ្មៅលើក្រដាសប្រាក់២០ដុល្លារ

ចែករំលែក៖

គម្រោងដាក់អតីតទាសករនិងចារកម្មសង្គ្រាមស៊ីវិលដែលជាជនជាតិស្មែកខ្មៅ Harriet Tubman លើក្រដាសប្រាក់២០ ដុល្លារ ដែលត្រូវបានព្យួរនៅក្រោមរដ្ឋការអតីតប្រធានាធិបតីTrump ឥឡូវនេះនឹងត្រូវបានបង្កើនល្បឿនដោយប្រធានាធិបតី Biden ដើម្បីបោះពុម្ពក្រដាសប្រាក់ថ្មី ។
គម្រោងដាក់រូបភាពរបស់លោកស្រីHarriet Tubman ជំនួសអតីតប្រធានាធិបតី Andrew Jackson លើក្រដាសប្រាក់២០ ដុល្លារកំពុងតែពិភាក្សាដើម្បីពន្លឿនការបោះពុម្ព។
តាមសារព័ត៌មានABC News បានផ្សាយថា ប្រធានាធិបតី បៃឌិនបានដំណើរការឡើងវិញនូវគម្រោងដាក់រូបស្ត្រីឈ្មោះHarriet Tubman ជាអតីតទាសករ អតីតចារកិច្ច និងជាសកម្មជនរំដោះស្ត្រីចេញពីទាសករក្នុងសម័យសង្គ្រាមស៊ីវិល អាមេរិក នៅលើក្រដាសប្រាក់២០ ដុល្លារ ។
លេខាព័ត៌មាននៅសេតវិមានលោកស្រី Jen Psaki នៅថ្ងៃទី ២៧ខែមករា បានប្រកាសថា «ចំណុចសំខាន់គឺក្រដាសប្រាក់របស់យើងបានបង្ហាញពីប្រវត្តិសាស្ត្រ និងពហុជាតិសាសន៍ ហើយរូបភាពលោកស្រី Harriet Tubman គឺជាការចាំបាច់បំផុតដើម្បីបង្ហាញពីបញ្ហាទាំងនោះ»។
លោកស្រីJen Psaki បានបញ្ជាក់ទៀតថា ក្រសួងហិរញ្ញវត្ថុអាមេរិក បានគាំទ្រដល់គម្រោងដាក់ស្ត្រីដើមកំណើតអាហ្រ្វិកលើក្រដាសប្រាក់២០ដុល្លារ ។ កន្លងមក គម្រោងនេះត្រូវបានផ្អាកក្រោមការដឹកនាំរបស់លោកត្រាំ ។
នៅពេលនេះក្រសួងហិញ្ញវត្ថុកំពុងតែអនុវត្តជំហានដំបូង ដើម្បីដាក់រូបភាពរបស់លោកស្រីHarriet Tubmanនៅលើក្រដាសប្រាក់២០ ដុល្លារ។ ជាមួយគ្នានេះដែរសមាជិកព្រឹទ្ធសភាអាមេរិក លោកJoyce Beatty បានប្រកាសថានឹងស្នើច្បាប់ ដោយមានខ្លឹមសារថា រាល់ក្រដាសប្រាក់២០ ដុល្លារ ដែលបានបោះពុម្ភក្រោយឆ្នាំ២០២៤គឺត្រូវតែមានរូបលោកស្រីHarriet Tubman។
តើលោកស្រី Harriet Tubman ជាអ្នកណា?
លោកស្រីHarriet Tubman ជាសកម្មជនមនុស្សធម៌ ដើមកំណើតអាហ្រ្វិក និងជាចារនារីក្នុងសម័យសង្គ្រាមស៊ីវិលនៅអាមេរិក ។ ឈ្មោះពិតរបស់លោកស្រីគឺ Araminta “Minty” Ross ហើយឪពុកម្តាយគឺជាទាសករស្បែកខ្មៅដូចគ្នា។
នៅឆ្នាំ១៨៤៩ លោកស្រីHarriet Tubman បានរត់គេចចេញពីជីវិតរស់នៅជាទាសករ ហើយក្លាយជាសកម្មជននាំមុខនៅក្នុងការតស៊ូទាមទារសិទ្ធិ។ នៅឆ្នាំ១៨៦១ ក្នុងពេលសង្គ្រាមស៊ីវិលអាមេរិកឈានដល់ដំណាក់កាលតានតឹងបំផុត លោកស្រីHarriet Tubmanបានចូលបម្រើក្នុងទាហានសហរដ្ឋក្នុងឋានៈជាចារនារី។ លោកស្រីជាអ្នកផ្តល់ដំណឹងពីការបង្កៃមីនរបស់កម្លាំងទាហានផ្តាច់ខ្លួនភាគខាងត្បូងដល់ទាហានសហរដ្ឋដើម្បីបញ្ចៀសគ្រោះថ្នាក់។ លោកស្រី ដើរតួនាទីយ៉ាងសំខាន់នៅក្នុងជ័យជម្នះ ដណ្តើមគ្រប់គ្រងដងទន្លេCambahee នៅការ៉ូលីណាខាងត្បូង។
ក្រោយបញ្ចប់សង្គ្រាម លោកស្រីHarriet Tubman បានបន្តសកម្មភាពដើរគ្រប់ទិសទីក្នុងទឹកដីអាមេរិកដើម្បីថ្លែងសុន្ទរកថា គាំទ្រដល់សិទ្ធិបោះឆ្នោតរបស់ស្ត្រីអាមេរិក៕ ដោយ៖ធី រីណា