សារព័ត៌មាន នគរវត្ត តែងតែនាំមុខគេជានិច្ច
ឧទ្ធម្ភាគចក្រមួយគ្រឿងបានធ្លាក់នៅភាគខាងកើតប្រទេសគុយបា ក្រោយពីបុកចូលកំពូលភ្នំបណ្តាលឲ្យមនុស្ស៥នាក់ស្លាប់ ។
សារព័ត៌មាន AFP បានផ្សាយថា ឧទ្ធម្ភាគចក្រធ្លាក់នៅកណ្តាលយប់ថ្ងៃទី ២៩ ខែមករា (ត្រូវនិងថ្ងៃទី៣០ មករាពេលវេលានៅកម្ពុជា)។ មន្ត្រីយោធាគុយបាបានឲ្យដឹងថាឧទ្ធម្ភាគចក្រដែលជួបគ្រោះថ្នាក់នេះហោះហើរពីខេត្ត Holguin ទៅកាន់ខេត្តGuantanamo ក៏ជួបគ្រោះថ្នាក់តែម្តង។ ឧទ្ធម្ភាគចក្រខាងលើជួបគ្រោះថ្នាក់ដោយបុកទៅលើកំពូលភ្នំបណ្តាលឲ្យមនុស្សទាំង៥នាក់នៅលើឧទ្ធម្ភាគចក្រស្លាប់ទាំងអស់។
នៅពេលនេះ មូលហេតុបណ្តាលឲ្យគ្រោះថ្នាក់ ក៏ដូចជាប្រភេទឧទ្ធម្ភាគចក្រមិនទាន់ប្រកាសឲ្យដឹងនៅឡើយទេ។ នេះជាគ្រោះថ្នាក់ទ្រង់ទ្រាយធំបំភុតមិនធ្លាប់មានក្នុងរយៈពេល ៣ឆ្នាំកន្លងមក ។ កាលពីខែឧសភាឆ្នាំ២០១៨ យន្តហោះមួយគ្រឿងបានធ្លាក់ក្រោយពេល ហោះហើរចេញពីអាកាសយានដ្ឋានក្នុងរដ្ឋធានី Havana បណ្តាលឲ្យមនុស្ស១១២នាក់ស្លាប់។ ក្នុងគ្រោះថ្នាក់នោះមានមនុស្សម្នាក់នៅរស់ ។
កាលពីឆ្នាំ២០១៧ ក៏មានគ្រោះថ្នាក់យន្តហោះដឹកយោធាធុនតូចបណ្តាលឲ្យមនុស្ស ៨នាក់ស្លាប់ នៅតំបន់ភ្នំ Artemisa ប្រទេសគុយបា ៕ដោយ៖ធី រីណា
រូបភាព៖Shutterstock
