សារព័ត៌មាន នគរវត្ត តែងតែនាំមុខគេជានិច្ច
នៅថ្ងៃទី១ខែកុម្ភៈនេះ កសិករឥណ្ឌានៅតែបន្តធ្វើបាតុកម្ម ហើយកម្លាំងសន្តិសុខឥណ្ឌាបានដាក់បន្លាលួស នៅតាមច្រកផ្លូវចូលក្នុងរដ្ឋធានីញូវដេលី ។
សកម្មភាពខាងលើកើតឡើងក្នុងពេលដែលរដ្ឋមន្ត្រីក្រសួងហិរញ្ញវត្ថុត្រៀមថ្លែងសុន្ទរកថាស្តីពីមូលនិធីប្រចាំឆ្នាំរបស់រដ្ឋាភិបាលឥណ្ឌានៅមុខរដ្ឋសភា ។
នៅពេលនេះ សេវាកម្មទំនាក់ទំនងនៅជាយក្រុងត្រូវបានកាត់ផ្តាច់ក្នុងតំបន់ដែលមានបាតុកម្មហិង្សា ។ កម្លាំងសន្តិសុខឥណ្ឌា បានបង្កើនសកម្មភាពការពារនៅជុំវិញវិមានរដ្ឋសភា និងការិយាល័យរដ្ឋាភិបាល នៅកណ្តាលទីក្រុង ។
កាលពីថ្ងៃទី២៦ខែមករា ពលរដ្ឋឥណ្ឌារាប់សិបពាន់នាក់បានដង្ហែក្បួនបាតុកម្មប្រឆាំងច្បាប់កែទម្រង់វិស័យកសិកម្មដោយបានបំបែករបាំងការពារ ហើយចូលទៅកាន់ទីលានក្រហមប្រវត្តិសាស្ត្រនៅរដ្ឋធានីញូវដេលី ។
កន្លងមកកសិករឥណ្ឌា បានប្រើប្រាស់គ្រឿងយន្ត ក្នុងនោះមានត្រាក់ទ័ររាប់សិបពាន់គ្រឿងបើកចូលទៅកាន់ទីក្រុង ហើយក្រុមបាតុករបានប្រើត្រាក់ទ័រអូសរបងការពារ បិទផ្លូវចេញ។
កម្លាំងប៉ូលិសបានបង្ខំប្រើប្រាស់គ្រាប់បែកផ្សែងឧស្ម័នបង្ហូរទឹកភ្នែក ដើម្បីរារាំងការធ្វើបាតុកម្ម ។ ការប៉ះទង្គិចគ្នារវាងកម្លាំងប៉ូលិសនឹង បាតុករបណ្តាលឲ្យប៉ូលិសជិត១០០នាក់រងរបួស ចំណែកបាតុករជាច្រើនត្រូវបានចាប់ខ្លួនពាក់ព័ន្ធការប្រើហិង្សា៕
ដោយ៖ ធី រីណា
