សារព័ត៌មាន នគរវត្ត តែងតែនាំមុខគេជានិច្ច
រដ្ឋមន្ត្រីក្រសួងសុខាភិបាលមីយ៉ាន់ម៉ាលោក Myint Htwe បានលាលែងចេញពីតំណែង ក្រោយកម្លាំងទាហានធ្វើរដ្ឋប្រហារ។ ជាមួយនេះលោកក៏បានអំពាវនាវដល់មន្ត្រីក្រោមឱវាទបន្តបម្រើដល់ប្រជាពលរដ្ឋក្នុងពេលការឆ្លងរាលដាលកូវីដ-១៩ កំពុងតែកើនឡើងខ្ពស់។
បណ្តាញទូរទស្សន៍យោធាមីយ៉ាន់ម៉ា បានផ្សាយថា កម្លាំងទាហានបានកាន់អំណាចដឹកនាំប្រទេស ហើយប្រកាសដាក់ប្រទេសក្រោមច្បាប់អាជ្ញាសឹក រយៈពេល១ឆ្នាំ។ កន្លងមក លោកស្រីអង់សាន ស៊ូជី ប្រធានាធិបតី U Win Myint និងថ្នាក់ដឹកនាំគណបក្សកាន់អំណាចត្រូវយោធាចាប់ខ្លួន ។
អ្នកដឹកនាំកម្មវិធីរបស់ទូរទស្សន៍យោធាMyawaddy TV បានឲ្យដឹងថា មូលហេតុដែលនាំឱ្យយោធាគ្រប់គ្រងអំណាច ដោយសារតែរដ្ឋាភិបាលមិនអាច ដោះស្រាយចំពោះការចោទប្រកាន់ពីការបោះឆ្នោតមិនមានតម្លាភាព កាលពីខែវិច្ឆិកាឆ្នាំ២០២០ ។
ពេលនេះអំណាចដឹកនាំប្រទេស ស្ថិតនៅលើអគ្គមេបញ្ជាការកងទ័ពមីយ៉ាន់ម៉ាឧត្តមសេនីយ៍Min Aung Hlaing ដែលជាបុគ្គលមានឥទ្ធិពលបំផុតក្នុងប្រទេសមីយ៉ាន់ម៉ា ។ ក្នុងពេលនេះអនុប្រធានាធិបតីទីមួយ លោកMyint Swe កាន់តំណែងជាប្រធានាធិបតីបណ្តោះអាសន្ន។
ការលាលែងចេញពីតំណែងនឹងការធ្វើស្ថានភាពនៃការឆ្លងរាលដាលកូវីដ-១៩ កាន់តែកើនឡើងខ្ពស់ ក្នុងដំណាក់កាលទីពីរ ។ បច្ចុប្បន្នមីយ៉ាន់ម៉ាមានករណីឆ្លងកូវីដ-១៩ កើនឡើងដល់ទៅ១៣៨ពាន់នាក់ និងស្លាប់ ២០៨២នាក់។
កាលពីសប្តាហ៍កន្លងមក មីយ៉ាន់ម៉ា បានចាប់ផ្តើមដំណើរការចាក់វ៉ាក់សាំង ហើយបុគ្គលិកសុខាភិបាល អ្នកនៅជួរមុខទទួលបានការចាក់វ៉ាក់សាំងមុនគេបង្អស់។ វ៉ាក់សាំង ដែលប្រទេសមីយ៉ាន់ម៉ា បានប្រើប្រាស់ គឺរបស់ក្រុមហ៊ុន AstraZeneca ផលិតនៅក្នុងប្រទេសឥណ្ឌា ៕ដោយ៖ធី រីណា
រូបភាព៖ Myanmar Times
