សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ជាកម្មករបម្រើការងារក្នុងក្រុមហ៊ុនថ្មម៉ាបចាវឆឹង ខណៈពេលកំពុងតែធ្វើការស្រាប់តែថ្មម៉ាបដួលសង្កត់ពីលើរហូតដល់ស្លាប់ភ្លាមមួយរំពច បង្កការភ្ញាក់ផ្អេីលកាលពីវេលាម៉ោង៣ និង២០នាទីរសៀល ថ្ងៃទី០១ ខែកុម្ភៈ ឆ្នាំ២០២១ ស្ថិតនៅភូមិទ្រា៤ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ។
សពជនរងគ្រោះមានឈ្មោះ យឹម បូណា ភេទប្រុស អាយុ៣៣ឆ្នាំ បច្ចុប្បន្នស្នាក់នៅផ្ទះជួលជិតកន្លែងកើតហេតុខាងលើ មានប្រពន្ធនិងកូនតូច២នាក់ និងមានស្រុកកំណើតនៅខេត្តពោធិ៍សាត់។
យោងតាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុ ជនរងគ្រោះកំពុងតែធ្វើការធម្មតា ដោយបានលីថ្មម៉ាបមួយផ្ទាំងធំ ហើយមិនដឹងមូលហេតុអ្វីស្រាប់តែដួល បណ្តាលឱ្យថ្មម៉ាបនោះសង្កត់ពីលើចំក្បាលស្លាប់មួយរំពេចចោលប្រពន្ធនិងកូនតូចៗចំនួនពីរនាក់រស់នៅជាមួយគ្នាក្នុងបន្ទុកគ្រួសារ។
ក្រោយពេលកើតហេតុ សពជនរងគ្រោះត្រូវបានសមត្ថកិច្ចចុះត្រួតពិនិត្យ និងធ្វើឯកសារប្រគល់ជូនក្រុមគ្រួសារសាច់ញាតិយកទៅធ្វើបុណ្យតាមប្រពៃណីនៅឯស្រុកកំណើត ខេត្តពោធិ៍សាត់៕
ដោយ ៖ ភារ៉ា ដង្កោ
