សារព័ត៌មាន នគរវត្ត តែងតែនាំមុខគេជានិច្ច
បុគ្គលិក FBI ២នាក់ស្លាប់ និង៣នាក់រងរបួសនៅក្នុងហេតុការណ៍បាញ់ប្រហារគ្នានៅយប់ថ្ងៃទី២ខែកុម្ភៈ ក្រោយពេលក្រុមFBI ទៅត្រួតពិនិត្យ ខុនដូមួយក្រោយទទួលបានព័ត៌មានថា មានការរំលោភបំពាន បៀតបៀនផ្លូវភេទកុមារ។ ហេតុការណ៍កើតឡើងនៅយប់ថ្ងៃទី២ខែកុម្ភៈ (ពេលវេលានៅអាមេរិក)។
នៅវេលាម៉ោង៦យប់ថ្ងៃទី២ខែកុម្ភៈ នៅជាយក្រុងFort Lauderdale រដ្ឋ Florida ពេលនោះក្រុមប្រតិកម្មរហ័សSWAT បានសម្រុកចូលអគារខុនដូ ។ ការប៉ះទង្គិចគ្នា បណ្តាលឲ្យ ក្រុម FBI ២នាក់ស្លាប់ មានឈ្មោះDaniel Alfin និង Laura Schwartzenberger គឺជាអ្នកឯកទេសស្តីពីការបៀតបៀនផ្លូវភេទលើកុមារ។
កន្លងមកក៏មានការបាញ់ប្រហារគ្នាទ្រង់ទ្រាយធំ នៅរដ្ឋ Oklahoma នៃសហរដ្ឋអាមេរិក ស្លាប់មនុស្ស ៦នាក់ ក្នុងនោះមានកុមារ ៥នាក់។ តាមសារព័ត៌មាន Inderpendent នៅយប់ថ្ងៃ ទី ០២ ខែកុម្ភៈ ឆ្នាំ២០២១បានផ្សាយថា ប៉ូលិសរដ្ឋអូក្លាហូម៉ា កំពុងបើកការស៊ើបអង្កេត លើការស្លាប់របស់បុរសម្នាក់ និងកុមារ ៥នាក់ ដែលត្រូវបានខ្មាន់កាំភ្លើងបាញ់សម្លាប់ នៅឯទីក្រុង Muskogee នាព្រឹកព្រលឹម ថ្ងៃទី២ខែកុម្ភៈនេះ(ម៉ោងនៅវ៉ាស៊ីនតោន)។
នៅពេលដែលក្រុមប៉ូលិស បានទៅដល់កន្លែងកើតហេតុ នៅវេលាម៉ោង ១ និង៣០ នាទីរំលងអធ្រាត្រ ក៏បានប្រទះឃើញ មានជនម្នាក់កំពុងកាន់កាំភ្លើងមួយដើម ហើយប៉ូលិសម្នាក់ក៏បានបាញ់ទៅលើខ្មាន់កាំភ្លើងនោះ តែមិនត្រូវ។ ទោះជាយ៉ាងណា ជនសង្ស័យត្រូវបានមន្ត្រីប៉ូលិសចាប់ខ្លួនបានហើយ បន្ទាប់ពីបានរត់គេចបានបន្តិច។
នៅខាងក្នុងផ្ទះដែលជាកន្លែងកើតហេតុ មន្រ្តីប៉ូលិសក៏បានរកឃើញបុរសម្នាក់ និងកុមារចំនួន ៤នាក់ទៀតដេកស្លាប់ ខណៈទារកទើបនឹងកើតម្នាក់ ក៏បានស្លាប់ដែរ នៅពេលបញ្ជូនទៅព្យាបាលនៅមន្ទីពេទ្យ៕ដោយ៖ធី រីណា
រូបថត៖AP
