សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ អ្នកភូមិនៅតំបន់អង្គរប្រមាណ៥០០នាក់ បានជួបជុំនាំគ្នាធ្វើពិធីចាប់ត្រីរួមគ្នា ដើម្បីយកធ្វើម្ហូបក្នុងពិធីបុណ្យប្រពៃណីបុរាណដែលគេហៅថា បុណ្យភូមិឬបុណ្យឡើងអ្នកតា ។ ពិធីចាប់ត្រីនេះធ្វើឡើងនៅព្រឹកថ្ងៃទី០៦ ខែកុម្ភ: ឆ្នាំ២០២១ ស្ថិតនៅបឹងបុរាណមួយ ក្នុងភូមិបង្កោង ឃុំអំពិល ស្រុកប្រាសាទបាគង ខេត្តសៀមរាប។
លោក ពេជ្រ ឃិន មេភូមិបង្កោង និងជាគណ:កម្មការរៀបចំ បានរៀបរាប់ថា ពិធីចាប់ត្រីនេះ មានគណ:កម្មការគ្រប់គ្រង និងអភិរក្សបឹង រៀបចំអោយមានការចាប់ត្រីតាមទម្លាប់ដូចឆ្នាំមុនៗដែរ ដែលក្នុងនោះត្រូវកំណត់ពេលវេលានៅម៉ោង៧ព្រឹក។ អ្នកភូមិត្រូវមានឧបករណ៍ចាប់ត្រី ដូចជា÷ ឈ្នាង សំណាញ់ និងអង្រុត ។ ឧបករណ៍ក្រៅពីនោះ ត្រូវបានហាមឃាត់ដូចជាមងជាដើម។
លោកបានបន្ដថា បឹងធំមួយនេះ អ្នកភូមិអភិរក្សត្រីទុកមិនឱ្យមានការនេសាទផ្តេសផ្តាស់នោះឡើយ គឺសម្រាប់តែរកត្រីរួមគ្នា ដើម្បីយកមកធ្វើជាចង្ហាន់ប្រគេនព្រះសង្ឃក្នុងថ្ងៃឡើងមាឃ ឬឡើងអ្នកតាដែលនឹងប្រារព្ធធ្វើឡើងនៅថ្ងៃទី០៧ ខែកុម្ភ: ឆ្នាំ២០២១ ឬថ្ងៃ៩រោចខែមាឃឆ្នាំជូត និងធ្វើម្ហូបសម្រាប់គ្រួសារ ព្រមទាំងទទួលភ្ញៀវផងដែរ ដែលពិធីនេះប្រារព្ធធ្វើជារៀងរាល់ឆ្នាំ។
លោកមេភូមិបានបន្ដថា នៅឆ្នាំនេះត្រីក្នុងបឹងនោះសំបូរច្រើនជាងឆ្នាំមុន ប៉ុន្ដែរកមិនសូវបានដោយសារទឹកនៅក្នុងបឹងមានច្រើន។លោកបានបន្ដថា ត្រីនៅក្នុងបឹងនោះត្រូវអនុញ្ញាតអោយអ្នកភូមិបង្កោងតែមួយគត់ ព្រោះពួកគាត់បានរក្សា និងអភិរក្សទុកមួយឆ្នាំមកហើយ ដើម្បីធ្វើពិធីចាប់រួមគ្នា ក្រោយពីអ្នកភូមិបានធ្វើពិធីរួចហើយ ទើបអ្នកភូមិផ្សេង មានសិទ្ធិរកត្រីនៅថ្ងៃបន្ទាប់ទៀតបាន។
លោក ព្រៀន ប្រប មេឃុំអំពិល ស្រុកប្រាសាទបាគង ខេត្ដសៀមរាប បានអោយដឹងថា ការចាប់ត្រីនេះធ្វើឡើងជារៀងរាល់ឆ្នាំ ដោយមានតែប្រជាជននៅក្នុងភូមិបង្កោង ឃុំអំពិលតែមួយប៉ុណ្ណោះ ដើម្បីយកត្រីមកធ្វើម្ហូប និងធ្វើចង្ហាន់ប្រគេនព្រះសង្ឃនៅថ្ងៃឡើងមាឃ ឬឡើងអ្នកតារបស់អ្នកភូមិអង្គរនោះបន្ទាប់ពីបញ្ចប់ការច្រូតកាត់ និងដាក់ស្រូវក្នុងជង្រុករួចរាល់។ លោកបានបន្ដថា នៅឆ្នាំនេះមានប្រជាពលរដ្ឋចូលរួមចាប់ត្រីប្រមាណ៥០០នាក់ ។
លោកបន្តថា មុនចុះចាប់ត្រី គណ:កម្មការភូមិ បាញ់កាំជ្រួច បន្លឺស្នូរជាសញ្ញា អនុញ្ញាតឱ្យចុះចាប់ត្រីរួមគ្នាតែម្ដង ពួកគាត់ប្រើប្រាស់តែឧបករណ៍បុរាណទាំងអស់ រួមមានដូចជា ឈ្នាង អង្រុត និងសំណាញ់ជាដើម។ ចំពោះការចាប់ត្រីនេះ គណ:កម្មការបានកំណត់ជាពីរផ្នែក។ ជាដំបូងប្រជាជនទាំងអស់អាចរកត្រីទុកសម្រាប់ខ្លួនឯងផ្ទាល់ រីឯមួយផ្នែក នៃបឹងដែលដាក់សម្រះការពារមិនឱ្យចាប់ពីដំបូងនោះ ត្រូវចាប់ទុករួមសម្រាប់ធ្វើទឹកនំបញ្ចុកប្រគេនព្រះសង្ឃ។ លោកបានបញ្ជាក់ផងដែរថា លោកមានគម្រោងស្ដារបឹងនោះអោយបានជ្រៅសម្រាប់ទុកជាប្រយោជន៍រួមរបស់សហគមន៍ភូមិបង្កោង។ ហើយនឹងស្នើសុំធ្វើផ្លូវចេញចូលអោយបានល្អ។
បើតាមមេភូមិបង្កោងលោក ពេជ្រ ឃិន បានបញ្ជាក់ថា ពិធីចាប់ត្រីគគ្រឹគគគ្រេងនេះមានរយ:ពេលប្រមាណជាង១០ឆ្នាំកន្លងមកហើយ។ លោកថាទិន្នផលត្រីឆ្នាំនេះ កើនឡើងជាងឆ្នាំមុនៗ ដែលអាច ប្រមូលបានប្រមាណជាងមួយតោន ប៉ុន្ដែបើធៀបកាលពី៥ឆ្នាំកន្លងមក បានប្រមាណ៥តោនក្នុងពេលប្រមូលផលរួមគ្នានោះ។ លោកថា លោកនឹងថែរក្សាប្រពៃណីចាប់ត្រីរួមគ្នានេះអោយបានគង់វង្ស ដើម្បីមនុស្សជំនាន់ក្រោយ បានស្គាល់ និងដឹងពីប្រពៃណីអ្នកភូមិអង្គរ៕
ដោយ៖សូ រិយា
