សារព័ត៌មាន នគរវត្ត តែងតែនាំមុខគេជានិច្ច
អ្នកស្ម័គ្រចិត្តទាំង៦០នាក់ដែលបានចាក់វ៉ាក់សាំងប្រឆាំងកូវីដ-១៩ Nano Covax ផលិតដោយប្រទេសវៀតណាមផ្ទាល់ គឺមានប្រសិទ្ធភាព និងសុវត្ថិភាពខ្ពស់ អាចទប់ស្កាត់ការឆ្លងកូវីដ-១៩ទម្រង់ថ្មីបានល្អ ។
បច្ចុប្បន្ន វិទ្យាស្ថានវេជ្ជសាស្ត្រយោធា របស់ក្រសួងការពារជាតិវៀតណាម បានបញ្ចប់ការសាកល្បងចាក់លើកទីមួយនិងលើកទីពីរដល់អ្នកស្ម័កចិត្ត៦០នាក់ ដោយមានកម្រិតចាក់ខុសៗគ្នា ។
តាមការវាយតម្លៃជាបឋម ក្រុមអ្នកឯកទេសបានបញ្ជាក់ថា វ៉ាក់សាំង Nano Covax មានប្រសិទ្ធភាពនិងសុវត្ថិភាព អាចទប់ស្កាត់ការឆ្លងរាលដាលវិីរុសកូវីដ-១៩ ទម្រង់ថ្មី នៅក្នុងប្រទេសអង់គ្លេសបាន។
ក្រោយការចាក់ សុខភាពអ្នកស្ម័គ្រចិត្តមានសភាពល្អធម្មតា ដោយមានករណីតូច ឈឺត្រង់កន្លែងចាក់ និងក្តៅខ្លួនតិចតួច តែបាត់ទៅវិញក្រោយពីចាក់បាន១-២ថ្ងៃ។ ក្រោយការចាក់ដំណាក់កាលទីពីរ ប្រព័ន្ធស៊ាំ និងអង់ទីគ័រកើនឡើងខ្ពស់ អាចទប់ស្កាត់ការឆ្លងកូវីដ-១៩បាន។
នៅពេលនេះដែរក្រសួងសុខាភិបាលវៀតណាមបានបើកកិច្ចប្រជុំដើម្បីវាយតម្លៃមុនពេល អនុម័តឲ្យធ្វើតេស្តដំណាក់កាលទីពីរ ទៅលើអ្នកស្ម័គចិត្តចំនួន៥៦០នាក់ ចាប់ពីពេលនេះដល់ខែមិថុនា ។
មជ្ឃមណ្ឌលប៉ាស្ទ័រនៅទីក្រុងហូជីមិញក៏នឹងចូលរួមនៅក្នុងការធ្វើតេស្តដំណាក់កាលទីពីរផងដែរ។
បើដំណាក់កាលទីពីរទទួលបានជោគជ័យនោះ នឹងចាប់ផ្តើមចាក់ដំណាក់កាលទី៣ ទៅលើក្រុមអ្នកស្ម័គ្រចិត្តដល់ទៅ១ម៉ឺននាក់ ហើយពង្រីកការធ្វើតេស្តនៅក្នុងប្រទេសមួយចំនួនដែលមានករណីឆ្លងច្រើនក្នុងសហគមន៍៕ដោយ៖ធី រីណា
