សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានស្លាប់ក្នុងថ្លុកឈាមគួរឲ្យរន្ធត់បំផុត បន្ទាប់ពីរូបគាត់ជិះម៉ូតូហុងដាស្គូពីមួយគ្រឿងក្នុងល្បឿនលឿនដល់ផ្លូវកោងមិនបង្អន់ និងកាច់ចង្កូតមិនទាន់បានជ្រុលទៅបុកខឿនផ្លូវដួលបោកក្បាលនឹងបង្គោលភ្លើងយ៉ាងពេញទំហឹង កាលពីវេលាម៉ោង៣ទៀបភ្លឺឈានចូលថ្ងៃទី១៧ ខែកុម្ភៈ ឆ្នាំ២០២១ នៅចំណុចច្រមុះជ្រូកស្ទឹងមានជ័យ តាមបណ្តោយផ្លូវចោមចៅ ក្នុងសង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ។
សពជនរងគ្រោះមានឈ្មោះ កូយ វាសនា ភេទប្រុស អាយុ២៨ឆ្នាំ មានអាសយដ្ឋាន តាមផ្លូវលំ ក្នុងភូមិកំរៀង សង្កាត់ព្រៃវែង ខណ្ឌដង្កោ រាជធានីភ្នំពេញ។
យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញជនរងគ្រោះជិះម៉ូតូម៉ាកហុងដាស្គូពី ពណ៌ខ្មៅ មួយគ្រឿង ពាក់ស្លាកលេខភ្នំពេញ1IL-8257ធ្វើដំណើរក្នុងទិសដៅពីកើតទៅលិចក្នុងល្បឿនលឿន ខណៈមកដល់ចំណុចកើតហេតុខាងលើជាផ្លូវកោងកាច់ចង្កូតមិនទាន់បានជ្រុលទៅបុកខឿនផ្លូវអូសជាច្រើនម៉ែត្របណ្ដាលឲ្យដួលបោកក្បាលនឹងបង្គោលភ្លើងបំភ្លឺផ្លូវបែកក្បាលធ្លាយខួរស្លាប់ភ្លាមៗនៅនឹងកន្លែងកើតហេតុ ។
ក្រោយកើតហេតុ សមត្ថកិច្ចមូលដ្ឋានបានចុះទៅដល់ ហេីយទំនាក់ទំនងទៅសមត្ថកិច្ចជំនាញមកធ្វើការវាស់វែងយកម៉ូតូទៅរក្សាទុកបណ្ដោះអាសន្ន។ដោយឡែកសពជនរងគ្រោះសមត្ថកិច្ចទំនាក់ទំនងទៅសាច់ញាតិមកទទួលយកទៅធ្វើបុណ្យតាមប្រពៃណី៕
ដោយ៖ ភារ៉ា ដង្កោ
