សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ រថយន្តសណ្តោងទូកុងតឺន័របើកលឿនពេកជ្រុលទៅឡើងលើខឿនផ្លូវបុកបង្គោលស្លាកសញ្ញាបាក់២ដើម ហើយរថយន្តនៅមិនទាន់អស់ល្បឿនបានជ្រុលទៅបុកបង្គោលភ្លើងបំភ្លឺផ្លូវបាក់អស់មួយដើមទៀត។ ក្រោយកើតហេតុអ្នកបើកបររថយន្តបានបើកទ្វាររត់គេចខ្លួនបាត់ស្រមោល បន្សល់ទុកតែរថយន្តនៅកន្លែងកើតហេតុ។
ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង ២ និង៥០នាទី រំលងអធ្រាត្រឈានចូលថ្ងៃទី ២៤ ខែកុម្ភៈឆ្នាំ ២០២១ ស្ថិតនៅតាមបណ្ដោយផ្លូវវេងស្រេង ក្នុងសង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។
ប្រភពព័ត៌មានពីប្រជាពលរដ្ឋនៅកន្លែងកើតហេតុ បានឲ្យដឹងថា មុនពេលកើតហេតុគាត់បានឃើញរថយន្តសណ្តោងទូកុងតឺន័រក្បាលពណ៌ស ពាក់ស្លាកលេខភ្នំពេញ 3F-3239 បើកបរដោយបុរសម្នាក់ ធ្វើដំណើរតាមបណ្តោយផ្លូវវេងស្រេងក្នុងទិសដៅពីលិចទៅកើត ក្នុងល្បឿនលឿន ខណៈមកដល់ចំណុចកើតហេតុបានរេចង្កូតឡើងលើខឿនផ្លូវទៅបុកបង្គោលស្លាកសញ្ញាបាក់អស់២ដើម រួចបន្តបើកទៅបុកបង្គោលភ្លើងបំភ្លឺផ្លូវមួយដើមទៀត បណ្តាលឲ្យខ្ទាតបង្គោលភ្លើងទៅចិញ្ចើមផ្លូវ។ប៉ុន្តៃជាសំណាងល្អដែរដែលនៅក្នុងគ្រោះថ្នាក់នេះមិនបណ្តាលឲ្យមានអ្នកធ្វើដំណើរតាមដងផ្លូវរងរបួស និងស្លាប់ គឺគ្រាន់តែខូចខាតទ្រព្យសម្បត្តិរដ្ឋប៉ុណ្ណោះ។
បន្ទាប់ពីហេតុសមត្ថកិច្ចមូលដ្ឋានបានចុះមកដល់ហើយទំនាក់ទំនងទៅសមត្ថកិច្ចជំនាញចរាចរណ៍ឱ្យចុះមកធ្វើកំណត់ហេតុស្ទូចយករថយន្តបង្កទៅរក្សាទុកនៅឯការិយាល័យចរាចរណ៍ផ្លូវគោក នៃស្នងការដ្ខានរាជធានីភ្នំពេញរង់ចាំដោះស្រាយគ្នានៅពេលក្រោយ៕
ដោយ៖ ជ្រោយពេជ្រ
