សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់ស្រវឹងស្រាបានបើករថយន្តមួយគ្រឿងយ៉ាងលឿន ខណៈដល់ផ្លូវកោងបួងចង្កូតមិនទាន់ក៏ហោះឡើងលើសួនចែកទ្រូងផ្លូវទៅបុក រះដើមផ្កាបណ្តាលឲ្យបាក់អស់ជាច្រើនដើម និងបន្តទៅបុកបង្គោលភ្លើងបំភ្លឺផ្លូវបាក់អស់មួយដើមទៀត កាលពីវេលាម៉ោង១១និង១០នាទីយប់ថ្ងៃព្រហស្បតិ៍ ទី៤ ខែមីនា ឆ្នាំ២០២១ ត្រង់ចំណុចខាងជើងរង្វង់មូលនាងកងស្រូវ ប្រមាណ៥០០ម៉ែត្រ ក្នុងសង្កាត់ព្រែកកំពឹស ខណ្ឌដង្កោ រាជធានីភ្នំពេញ។
រថយន្តបង្កម៉ាកហាយឡេនឌ័រ ពណ៌ទឹកប្រាក់ ស៊េរីឆ្នាំ២០០៣ ពាក់ស្លាកលេខភ្នំពេញ2AX.2901បើកបរដោយបុរស ស្រវឹងស្រាម្នាក់។
យោងតាមសមត្ថកិច្ចបានប្រាប់ឲ្យដឹងថាដំបូងឡើយ រថយន្តហាយឡេនឌ័រខាងលេីបានធ្វេីដំណេីរតាមបណ្ដោយផ្លូវ២១៧ ទិសដៅពីជើងមកត្បូងយ៉ាងលឿនដូចហោះ ខណៈមកដល់ចំណុចកើតហេតុខាងលើដោយសារផ្លូវកោងផងនោះ បានបួងចង្កូតមិនទាន់ក៏ហោះឡើងលើសួនច្បារពុះចែកទ្រូងផ្លូវបណ្ដាលឱ្យបុករះដើមផ្កាបាក់អស់ជាច្រើនដើម និងបង្គោលភ្លើងបំភ្លឺផ្លូវមួយដើមទៀតដាច់រៀបដល់ដី។ ចំណែកឯរថយន្តខូចខាតផ្នែកខាងមុខ បែកម៉ាស៊ីនហូរប្រេងពេញផ្លូវរងការខូចខាត យ៉ាងដំណំ តែក្នុងហេតុការណ៍គ្រោះថ្នាក់ចរាចរណ៍នេះមិនបណ្តាលឲ្យនរណាម្នាក់រងរបួសនោះទេ។
ក្រោយពីកើតហេតុសមត្ថកិច្ចជំនាញចុះមកវាស់វែងស្ទូចយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាន នគរបាលរាជធានីភ្នំពេញរង់ចាំដោះស្រាយគ្នានៅពេលក្រោយ៕
ដោយ ៖ ភារ៉ា ដង្កោ
